"Şamaxı" klubunun təcrübəli futbolçusu Tərlan Quliyevin Futbolmedia.Az saytına müsahibəsi.

Tərlan Premyer Liqanın 26-cı turunda səfərdə “Sumqayıt”a qarşı oynadınız. Çoxları bu oyunda “Şamaxı”nın qalib gələcəyini gözləsə də, belə olmadı. Sən özün də, ikinci komandadan yeni qayıtmısan. Ümumiyyətlə, bu və dünən keçirilən oyun haqda sənin fikirlərini öyrənmək istərdim?

Bildiyiniz kimi, oyunun hazırlıq proseslərində mən iştirak etməmişəm. Çünki ikinci komandaya göndərilmişdim. Lakin onu deyə bilərəm ki, komandanın hazırki ab-havası çox ağırdı. Bir neçə məğlubiyyətdən sonra psixoloji baxımdan özümüzə gələ bilməmişik. Lakin meydana qələbə üçün çıxmışdıq. Çünki oyun-boyu üstün olsaq da, nəticə xeyrimizə olmadı. Rəqib komandanın forvadı əla oyunla nöqtəni qoydu.

Məğlubiyyətin səbəbini nədə görürsən?

Məğlubiyyətin səbəbini izah etməyə vaxtımız çatmaz. Bir çox şeyləri məğlubiyyətin əsas səbəbi kimi göstərmək olar. İlk növbədə komandanın daxilində birlik yoxdur. Bundan başqa daxili problemlərimiz də var. Çünki hər bir komandanın daxilində problemlər olur. Problemsiz komanda yoxdur. Bizim daxili problemlərin həll yolları demək olar ki, həll edilmir. Yada ki, bu problemin kökünü tapmaq istəmirlər. Bütün bu amillər oyunlara mütləq təsir edir. Heyətimizdə 5-6 legioner var. Lakin “Sumqayıt”ın heyətində 90 faiz yerli futbolçular çıxış edir. Üstünlük bizdə olsa da, bunu dəyərləndirə bilmədik.

Mayın sonunda “Şamaxı” ilə müqavilənin sonu çatır. Rəhbərlikdən yeni müqavilə təklifi alımısan. Yoxsa?

Mayın sonunda müqaviləm başa çatır. Mövsümün sonu azad agent statusu alacam. Lakin yeni müqavilə ilə bağlı rəhbərlikdən şəxsən mənə təklif gəlməyib. Lakin bildiyimə gör bir neçə futbolçu ilə artıq yeni müqavilə danışıqları olub.

Sözlərindən belə çıxdı ki, mayın sonu komandanı dəyişəcəksən?

Bilirsiniz, yeni müqavilə təklif olunmasa, belə davam edərsə, əlbəttə ki, iş yerimi dəyişəcəm. Başqa nə edə bilərəm ki?



Bildiyimə görə, 3 Azərbaycan klubundan yaxşı təkliflər almısan. Bu klublardan ikisi iddialılar sırasındadır. Doğru məlumatdır?

Düzünü deyim ki, təkliflərlə bağlı artıq baş sındırıram. Onların göndərdiyi təklifləri, maliyə məsələlərini nəzərdən keçirmişəm. Lakin bir peşəkar futbolçu kimi bu haqda indidən açıqlama vermək düz olmaz. Çünki hazırda “Şamaxı”ya məxsusam. Qarşıda bir neçə tur var. İndidən açıb nəsə danışmaq düzgün olmaz. Bundan başqa mən 5-6 ildir ki,bu komandada çıxış edirəm. Bu klubun çörəyini yemişəm. Rəhbərliklə yaxşı münasibətimiz var. Buna görə də, ilk öncə hörmət əlaməti olaraq onlardan son sözün gəlməsini gözləyəcəm. Əgər yeni müqavilə təklifi gəlməzsə, onda gələn təklifləri dəyərləndirəcəm.

Əli HƏYATİ