“Sabah”ın baş məşqçisi Valdas Dambrauskas UEFA Çempionlar Liqasının Liqa mərhələsinin 4-cü turunda “Vikinq”ə qarşı keçirəcəkləri oyun haqda danışıb.

Futbolmedia.az xəbər verir ki, litvalı mütəxəssis görüşdən əvvəl təşkil olunan mətbuat konfransında süni örtüklü meydanda oynamağın çətinlikləri, komandasının hazırlığı və rəqib barədə fikirlərini bölüşüb.

“Bu mövsüm Çempionlar Liqasında süni örtüklü meydanda üçüncü oyunumuzu keçirəcəyik. Bundan əvvəl Uelsdə və Finlandiyada oynamışıq və hər iki matçda qalib gəlmişik. Burada da eyni nəticəni əldə etməyə çalışacağıq.

Təbii ki, “Vikinq”in bizdən əvvəl keçirdiyi oyunları yaxşı təhlil etmişik. Onların hər matçını izləmişik. “Bavariya”nın da burada çətinlik çəkdiyini gördük. UEFA və FİFA belə meydanlarda oynamağa icazə verirsə, biz də bu qaydalara əməl edirik. Düşünürəm ki, meydanın örtüyü qalibin müəyyənləşməsində əsas amil olmayacaq. Taktika, texnika, psixoloji hazırlıq və atmosfer daha vacib rol oynayacaq".

O, komandaasının durumu barədə bunları deyib: "Zədələrə gəlincə, belə oyunlarda bu cür hallar həmişə olur. Qarşıdakı 28 gün ərzində 8 matç keçirəcəyik. Bu, asan deyil. Amma hər bir futbolçu mənim komandamın üzvlərinin yerində olmaq, Çempionlar Liqasında çıxış etmək istərdi. Bəzi məşqçilər də bizim yerimizdə olmağı arzulayardılar. Norveçə 23 hazır futbolçu gətirmişik. Lakin onlardan bəziləri ilə bağlı qərarımı axşam məşqindən sonra verəcəyəm. Bir neçə gün əvvəl qatarla 6 saat yol getdik və çətin oyun keçirdik. Daha sonra evə qayıtmaq üçün yenidən 6 saat vaxt sərf etdik. Dünən isə 5 saatlıq uçuşla Norveçə gəldik. Bütün bunlardan sonra bərpa olunmaq çətindir. Futbolçuların məşqə və oyuna tam hazır vəziyyətə gəlməsinə diqqət yetirməliyik. Rəqibi təhlil etmişik və Norveç çempionatında da rəqabətin yüksək olduğunu görürük”.