"Səbail" klubunun qapıçısı Rəşad Əzizlinin Futbolmedia.Az saytına müsahibəsi.

Rəşad Pemyer Liqanın 22-ci turunda evdə “Qəbələ”ni darmadağın etdiniz. Bir çoxları bu oyunda başqa nəticə gözləsə də, qalib gəlməklə sürprizə imza atdınız. Komandanın təcrübəli qapıçısı olaraq matç haqda nə deyərdin?

Oyuna adi qayda da, hazırlaşmışdıq. Sadəcə, artıq qələbə qazanmaq vaxtımız yetişmişdi. Belə deyim ki, istək olan yerdə yaxşı nəticə də, olur. Komandamız sonacan mübarizə apardı. Ən əsas məsələ odur ki, evdə, inamlı qələbə qazanmağı bacardıq.

Belə böyük hesablı qələbə qazanacağınızı gözləyirdinizmi. Yoxsa, minimal hesablı qələbəyə özünüzü hazırlamışdınız?

Düzünü deyim ki, oyundan öncə desəydilər ki, (3:0) hesabla qalib gələcəksiniz, buna inanmaq çətin olardı. Çünki rəqib komanda da, güclü klublardan olan “Qəbələ”dir. Ancaq qalib gələcəyimizə çox inanırdıq. Lakin rəqibi darmadağın edəcəyimizi gözləmirdim. Vurduğumuz qollar da, çox gözəl idi.

Rəşad açığını deyim ki, bu qalibiyyətdə ən çox payı olanlardan biri də, sənsən. Çünki yaxşı qapıçı komandanın yarısıdır deyərlər. Qapını toxunulmaz saxlamaqla, bir neçə real qoldan komandanı qurtarmaqla, qalibiyyətə təkan verdin. Bəs sən necə düşünürsən. Öz oyunundan razı qaldınmı?

Qarşıma məqsəd qoymuşam ki, oyundan-oyuna artırım. Bunun üçün çox çalışır, çoxlu məşqlər edirəm. Etdiyim səhvlərimi yaxşıca analiz edirəm. Çalışıram ki, çatışmayan cəhətlərimi aradan qaldırım. Bəli, oyunda bir neçə real qol vəziyyətlərində yaxşı çıxış edərək, komandamı qol buraxmaqdan qurtardım. Ümumilikdə öz oyunumdan razı qaldım. Lakin potensialım bundan da, yaxşı oyun sərgiləməyə imkan verir.

Sənin “Səbail”lə müqavilənin müddəti mayda başa çatır. Bildiyimizə görə, müqaviləyə əsasən “Neftçi”yə məxsuzsan. “Neftçi” səni komandada saxlamaq qərarına gəlsə, hansı seçimi edərsən?

Bəli. İlk olaraq deyim ki, mən “Neftçi”nin oyunçusuyam. Düşünürəm ki, ilk qərar klub tərəfindən gəlməlidir. Məhz bundan sonra digər klublardan gələn təklifləri dəyərləndirərəm.



Sənin potensialın, oyunun, təcrübəni nəzərə alsaq, bir çoxları öz komandasında görmək istəyər. Lakin “Neftçi”nin səni digər kluba buraxacağı daha real görünmür. Cəlbedici təkliflər gələrsə, seçimin başqa klub olarmı?

Əlbəttə ki, yaxşı təkliflərin gələcəyini gözləyirəm. Gələn təklifləri nəzərdən keçirəcəm. Lakin “Neftçi” məni komandada saxlamaq qərarı verərsə,razılıq əldə olunarsa, bu klubda qalmağı üstün tutardım. Çünki “Neftçi” çox böyük klubdur. Onların azarkeşləri də, möhtəşəmdir. Doğrudan da, “Neftçi”nin 12-ci oyunçuları möhtəşəm dəstək verirlər. Buna görə də, “Neftçi”də yenidən oynamaq mənim üçün çox xoş olar.

Əli HƏYATİ