"Keşlə" klubunun təcrübəli futbolçusu Tərlan Quliyevin Futbolmedia.Az saytına müshibəsi.

Tərlan çətin Qəbələ səfərinə hzırlaşırsınız. Rəqib komandanın evdə çox yaxşı təsir bağışladığını bilirsiniz. Bu oyun üçün hazırlıqlarınız hansı səviyyədə gedir?

Hazırlıqlarımız çox yüksək səviyyədə gedir. Hardasa 5 gündür ki, məşqləri bərpa emişik.Demək olar ki,asan məşqlərimiz olmayıb. Sabah öz aramızda yoxlama oyunu keçirəcəyik. Rəqib komandanın gücünə isə yaxşı bələdik. Çətin səfər oyunu bizi gözləyir. Rəqib komanda iki oyundur ki, qalib gələ bilmir. Bu isə o, deməkdir ki,onlar bizimlə oyunda 3 xal üçün sonacan vuruşacaqlar. “Qəbələ” iki oyuna 9 top buraxıb.

Belə baxanda “Qəbələ” iki turdu məğlub olaraq, ruh düşgünlüyü yaşayır. Qapılarında çox qol gördülər. Bu imkandan istifadə edərək qalib gəlmək şansınız nə dərəcədə yüksəkdir?

Mən belə deməzdim. “Qəbələ” iki oyunda “Qarabağ” və “Neftçi” kimi güclü klublara məğlub olub. Düzdü, məğlub olduqları oyunlarda hesabları biraz böyük olub. Lakin bu onların heç də, zəif olduqlarına dəlalət etmir . Mən əksini fikirləşirəm. Düşünürəm ki, “Qəbələ” qələbə qazanmaq üçün meydanda var –gəl edəcək. Çünki rəqib 2-3-cü yer uğrunda mübarizə aparır. Bəlkə də, bizimlə oyunda yüksək məbləğdə mükəfat da, qoyacaqlar.

Heç-heçə sizin üçün uğurlu nəticə sayılacaqmı?

Belə deyək də, hazırki durum, rəqibin güclü komanda olması, səfərdə oynamağımızı nəzərə alsaq, bir xal da bizi qane edərdi. Lakin biz Qəbələyə bir xal üçün getmirik. Turnir cədvəlindəki mövqeyimiz də, ürəkaçan deyil. Artıq “Sabah”da bizdən çox uzaqlaşa bilər. Bundan başqa qarşıda çətin turlar var. Məhz buna görə, meydana qələbə üçün çıxacağıq. Səfərdən üç xalla dönmək üçün meydanda sonacan vuruşacağıq.

“Keşlə” ilə müqavilənin müddəti mövsümün sonu başa çatır. Bir çox futbolçular artıq onlara gələn transfer təkliflərini dəyərləndirməyə başlayıblar. Səninlə bağlı qulağımıza məlumatlar çatıb. Bildiyimizə görə, 4 klubdan təklif almısan. Yəqin ki, etiraf edərsən?




Düzünü deyim ki, mən bu təklifləri sirr saxlmağa çalışıram. Çünki mövsüm davam etdiyi müddətcə mənə gələn transfer təkliflərindən danışmaq istəməzdim. Çnki hələ ki, “Keşlə”nin futbolçusuyam. Onlarla müqaviləmin müddəti mayda başa çatır. Hazırda fikrimi oyunlara yönəltmişəm. Lakin təkliflər olduğu doğrudur. Ancaq təklif göndərən Azərbaycan klublarının sayı 3-dür Yəni üç yerli klubdan təklif almışam. Yəni 4 klub deyil. Biri isə əcnəbi komandadır. Əcnəbi komanda mənə təklifi hələ keçən il noyabır ayında göndərib. Danışıqlarımız normal davam edir. Mənə də, maya qədər möhlət verib. İstənilən zaman qapımız sənə açıqdır deyiblər. Nə yerli, nədə ki, əcnəbi klubun hazırda adını çəkmək bizə yaraşmaz. Çünki ağır, gərgin, çempionat oyunlarımız var. Mən hələ ki, “Keşlə”nin futbolçusuyam. Lakin ola bilər ki, hazırki komandam “Keşlə”dən mövsümün sonunda daha sərfəli təklif gələ bilər ki, mən qala bilərəm. Buna görə də, tələsmək istəmirəm.

Bəs ölkə xaricindəki təklifin sərfəli olarsa, getmək istərdinmi. Yoxsa?

Bilirsiniz, istənilən futbolçunun arzularından biri, bəlkə də, birincisi yaxşı xarici klubda top qovmaqdır. Əlbəttə ki, yaxşı şərtlər əsasında şans olacaqsa, xarici çempionatda oynamağa qərar verə bilərəm.


Əli HƏYATİ