"Turan Tovuz" klubunun futbolçusu Tərlan Quliyevin Futbolmedia.Az saytına müsahibəsi.

Tərlan ilk olaraq evdə “Zirə” ilə oyunda məğlubiyyətiniz haqqında danışmaq istərdim. “Sabah” üzərində möhtəşəm qələbədən sonra çoxları, sizdən daha bir sensasiya gözləyirdi. Lakin əksinə olaraq məğlub oldunuz. Bu məğlubiyyətin səbəbini nədə görürsən?

Ümumiyyətlə, “Zirə” klubu nəticəyə oynamağı sevən komandadır. Qalib gəldiyimiz oyunlara hazırlaşdığımız kimi “Zirə” ilə oyuna da, eyni cür hazırlaşmışdıq. Sadəcə, ehtiyyatsızlıqdan, diqqətsizlikdən iki qol buraxdıq. Buna baxmayaraq, bizim ikinci yarıda 3-4 real qol imkanlarımız oldu. Real qol imkanlarını dəyərləndirə bilsəydik, nəticə başqa cür olardı. Çox təəssüflər olsun ki, nəticəni dəyişə bilmədik. Ancaq bu oyunu artıq unudub, digər bir matçça köklənmişik.

Bu nəticədən sonra rəhbərlik, baş məşqçi Ayxan Abbasov sizə nələr söylədi?

Bilirsiniz, bütün oyunlardan sonra mütləq komanda daxilində iclas olur. Həm udanda, uduzanda, hətta heç –heçə olan oyunlarda belə komanda daxilində mütləq iclas keçirilir. Və həmin toplantıda oyunu analiz edirik. Səhvlərimiz haqqında müzakirələr gedir. “Zirə” ilə oyunda ilk qolda mənim də, səhvim oldu. Birə -bir mübarizədə məğlub oldum. Lakin bu futboldur. Futbolda belə hallar olur.

Növbəti oyunda “Neftçi”yə qarşı oynayacaqsınız. Bu rəqib də, “Zirə”dən zəif deyil. Əksinə bəlkə də, daha güclüdür. Sən də, vaxtı ilə bu klubda forma geyinib, tarix yazmısan. “Neftçi” ilə oyuna necə hazırlıq gedir. Komandada əhval –ruhiyyə necədir?

Bu oyuna da, çox ciddi hazırlaşırıq. Komanda daxilində əhval-ruhiyyə yaxşıdır. Səfərdən xalla dönmək istərik. Rəqib komandanı tanıtmağa ehtiyyac yoxdur. Rəqib komanda, həm də, heyət baxəməndan yüksək səviyyəli futbolçulardan ibarətdir. Oyunun taleyini hər an həll edə biləcək futbolçulara malik bir komandadır. Ona görə də, səfər oyununda çox diqqətli və əzəmikar olmaq lazımdır.

“Neftçi” ilə oyundan səfərdən bir xalla qayıtsanız, bunu “Turan Tovuz” üçün uğur hesab edəcəksinizmi. Yoxsa?

Hal –hazırda nəinki “Neftçi”dən, bütün klublarla oyunlardan xalla ayrılmaq istəyirik. Çünki bizim üçün hər bir xal çox önəmli və vacibdir. Sonuncu turlarda hər bir itirilən xal üçün peşman ola bilərik. Ona görə də, biz bütün oyunlara qalibiyyət üçün çıxırıq. Ən azı meydanı xalla tərk etmək istəyirik. “Neftçi” ilə oyunda da, meydana xal qazanmaq üçün çıxacağıq.

Əli HƏYATİ