"TUran Tovuz" klubunun müdafiəçisi Tərlan Quliyevin Futbolmedia.Az saytına müsahibəsi

Tərlan Bakıda “Sabah”la oyunda gözəl bir matçın və qolların şahidi olduq. Çoxları bu qarşılaşmada “Sabah”ın inamlı qələbəsini gözləyirdilər. Lakin hər şey əksinə oldu. Komandanın aparıcı siması olaraq qələbəni şərh edərdin?

Həqiqətən də, çox maraqlı oyun keçdi. Bu qarşılaşmada bir xal belə qazanmaq bizim üçün uğurlu nəticə idi. Yəni səfərdən bir xalla qayıtmağa belə razı idik. Lakin şükürlər olsun ki, yüksək əzimkarlıq nümaiş etdirərərk qalib gəlməyi bacardıq. Əvvəlcədən oyunun ağır keçəcəyini bilirdik. Çünki “Sabah” klubunun çox güclü futbolçuları, legionerləri var. Buna görə də, bu məhsuliyyəti dərk edirdik. Rəqib komandanın ön xətt oyunçuları ölkəmizin ən güclülərindəndir. Düşünürəm ki, çox dəqiq və səbirli oynayaraq, qalib gəlməyi bacardıq.

Səmimi deyərdin, heç “Sabah”ı məğlub edəcəyinizi gözləyirdinizmi. Yoxsa?

“Sabah” klubu çempionat ərzində 1-2 dəfə məğlub olub. Yəni asan məğlub olan komanda deyil. Bundan başqa, həm maliyə, həm də, səviyyəli futbolçuları ilə bizdən qat –qat üstün durumdadırlar. Lakin bu futboldur. Futbolda istənilən nəticə ola bilər. Düzünü deyim ki, qalib gələcəyimizə inam çox deyildi. Lakin xal alacağımıza inam vardı. Şükürlər olsun ki, istəyimizə nail olduq.

Bu oyunun ən güclülərindən biri sən oldun. Ümumiyyətlə, mövsüm başlayandan çox möhtəşəm, sabit oyun sərgiləyirsən. Demək olar ki, daim əsas heyətdə oynayırsan. Məhz bu səbəbdən komandanın uğurlarında sənin də, payın az deyil. Öz oyununu necə qiymətləndirərdin?

Təşəkkür edirəm ki, doğru-düzgün qiymət verirsiniz. Doğurdan da, mövsüm ərzində oyunları əla səviyyədə keçirdim. Daha çox əsas heyətdə oynadım. Baş məşqçi Ayxan müəllim mənə etimad göstərdi. Baş məşqçimiz hər şeyi çox düzgün və yaxşı analiz etməyi bacarır. Düşünürəm ki, daha yaxşı oyun sərgiləyə bilərəm. Görürəm ki, hər oyundan –oyuna daha yaxşı təsir bağışlayıram. Ümumiyyətlə, biz komanda şəklində əla oyun sərgiləyirik. Bilirsiniz ki, müdafiə elə hücumdan başlayır. Yəni komanda şəklində əla oyun sərgiləyirik. Mən də, əlimdən gələni edirəm ki, komandama xeyir verim. Şükürlər olsun ki, bunu bacarıram.

Tərlan mövsüm ərzində yüksək performans göstəririsən. Buna görə də, milli komandaya dəvət amaq sənin haqqın olduğunu düşnürəm. Bəs sən özün necə, milli komandadan, De Byazi, Arif Əsədovdan dəvət gözləyirsənmi?

Milli bütün futbolçuların arzusudur. Millidə oynamaq biz futbolçular üçün şərəfdir. Ən pik nöqtələrdən biridir. Əlbəttə ki, mənim də, arzum, istəyim milli komandada oynamaqdır. İstərdim ki, millimizə xeyir verim. Doğru buyurdunuz ki, mövsüm ərzində yaxşı və etibarlı oyun sərgilədim. Buna görə də, milliyə çağrılmaq ehtimalım var. Niyə də, olmasın axı. Mən əsas heyətdə oynayıram. Komandam Azərbaycan kubokunun yarımfinalına yüksəlib. Çempionatda ən az qol buraxn komandalardan biriyik. Sensasiyalar edə bilirk. İstənilən güclü rəqiblə oyunda xal almaq potensialımız var. “Sabah” və digər güclü rəqibləri məğlub edə bilirik. Turnir cədvəlində yavaş-yavaş yuxarıya doğru irəliləyirik. Bütün bunlarda “Turan Tovuz”n futbolçusu, müdafiəçisi olaraq mənim az da, olsa payım var. Mən daha nə etməliyəm ki, milli komandaya çağrılım. Gedib ”Mançester “Yunayted”də, “Real “da oynayım ki, milliyə dəvət alım? Bildiyimə görə, millinin baş məşqçisi De Byazi “Sabah” – “Turan Tovuz” matçını izləyirdi. Yəqin ki, həqiqəti və kimin nəyə qadir olduğunu görüb. İnanıram ki, milli komandaya çağrılanlar sırasında mənim də, adım olar.

Əli HƏYATİ