"Kəpəz" klubunun kapitanı Tural Axundovun Futbolmedia.Az saytına müsahibəsi.

Tural uzun illər sonra Gəncədə doğma azarkeşlər önündə “Neftçi”yə qarşı oynadınız. Oyun anşlaqla keçdi. Kamandanın kapitanı olaraq oyun, azarkeşlər və sair haqqında nə deyərdin?

İlk öncə, oyundan danışmaq istərdim. Maraqlı və gərgin oyun oldu. Rəqib komandanın gücü bəlli idi. Onların da, “Turan Tovuz”la xal itirdikdən sonra Gəncəyə qələbə dalınca gələcəyi gözlənilən idi. Lakin komandaız meydanda əsl mübarizə göstərdi. Rəqibin kimliyindən, gücündən aslı olmayaraq, pis oynamadıq. Sadəcə, müəyyən epizodlar zamanı bəxtimiz gətirmədi. Gənədəki oyuna, anşlaqa gəlincə isə hər şey möhtəşəm idi. Gəncə azarkeşləri möhtəşəm idi. Biz bu oyunda azarkeşlərdən də, əla mötivatsiya alırdıq. Gəncə azarkeşlərinə bir kapitan olaraq öz təşəkkürümü bildirirəm.

Səncə, məğlubiyyətə əsas səbəb nə oldu. Çünki çox yaxşı oynadınız. Səncə, qırılma nöqtəsi nə oldu?

Özünüz gördünüz ki, çox yaxşı oyun oynayırdıq. Sadəcə, qırmızı vərəqə işlərimizi korladı. Bundan sonra “Neftçi” kimi güclü rəqiblə azlıqda oynamaq asan olmadı. Lakin bütün bunlara baxmayaraq,baş məşçimiz Tərlan müəllim bizi oyuna yaxşı köklədi. Meydanda daha soyuqqanlı olmağımız üçün tapşırıqlarını verdi. Hətta azlıqda belə “Neftçi”yə qarşı möhtəşəm oynadıq. Məğlubiyyətimizin əsas səbəbini azlıqda qalmağımız və bəxtsizliklə əlaqələndirərdim. Qapımıza vurulan qolları gördünüz. Zərbədn sonra top rikaşetdən qapımıza girdi. Yəni çox bəxtsizlik yaşadıq. Real qol vəziyyətlərimizi dəyərləndirə bilsəydik, hesab başqa cür ola bilərdi.

Yeni baş məşqçiniz Tərlan Əhmədovun rəhbərliyi altında ilk dəfə kapitan sarğısı ilə əsas heyətdə yer aldın. Bundan sonra kamandanın kapitanı sənsən. İllər sonra Gəncədə yenidən “Kəpəz”də kapitan kimi meydana çıxmaq sənə hansı hisslər bəxş etdi?

İlk öncə mənə ehtimad göstərən baş məşqçimiz Tərlan müəllimə öz təşəkkürümü bildirirəm. Əlimdən gələni edəcəm ki, bu kapitanlıq sarğısına layiq oyun nümaiş etdirim. Ən əsas məsələ isə komandamızın uğrudur. Kapitanlıq sarğısı çox məhsuliyyətli vəzifəidir. Gərək komanda ilə baş məşqçi ilə birlikdə güc sərf edəsən. Komandanı irəliyə doğru aparasan. İllər sonra Gəncədə doğma azarkeşlər qarşısında yenidən kapitan kimi oynamaq möhtəşəm hissdir.

Növbəti tur səfərdə “Qəbələ” kimi güclü komandaya qarşı oynayacaqsınız. Bu oyunda xal qazanmaq,şanslarınızı necə dəyərləndirirsən?

Çox çətin Qəbələ səfərimiz olacaq. Lakin bizim də, başqa yolumuz yoxdur. Mütləq qələbə və ən azı xala ehtiyyacımız var. Tərlan müəllim komandanı, oyunun sistemini dəyişib. Komanda indi daha sürətli, daha keyfiyyətli futbol nümaiş etdirir. Komandada ruh yüksəkliyi, özünəinam vr. Biz istəyirik ki, “Qəbələ”ni elə Qəbələdə məğlub edək. Ən azı səfərdən xalla qayıdaq.

Əli HƏYATİ