"Keşlə" klubunun futbolçusu Tural Axundovun Futbolmedia.Az saytına müsahibəsi.

Tural Premyer Liqanın 11-ci turunda ölkənin ən güclü klubu olan “Qarabağ”a səfərdə qonaq oldunuz. Minimal hesabla məğlub olduğunuz oyun haqda fikirlərin?

Belə deyim ki, istədiyimiz kimi oyunumuzu sərgiləyə bilmədik. Bunun da, səbəbi “Qarabağ”ın güclü və sürətli hücumlar quran komanda olması oldu. Bilirdik ki, qarşımızda, öz meydanında bizə qarşı mübarizə aparan klub nəyə qadirdi. Lakin bütün bu çətinliklərə baxmayaraq, “Qarabağ”ın müdafiə xəttini yarmağa, qol vurmağa çalışırdıq. Hətta real qol imkanlarımızda oldu. Lakin dəyərləndirə bilmədik.

Çoxları matçın bol qollu, daha məhsuldar keçəcəyini deyirdi. Lakin gözlənilənlərin əksi baş verdi. Bəs sən necə?

Düzünü deyim ki, hesabın böyük və ya kiçik olacağını fikirləşməmişik. Ən əsas məslə nəticə qazanmaq haqqında düşünürdük. Yəni əsas məsələ güclü rəqibdən xal qoparmaqdır. Oyun zamanı böyük əzimkarlıq nümaiş etdirsək də, xal ala bilmədik.

Tural sən “Qarabağ”la oyunda ən yaxşılarından idin. Demək olar ki, səhvsiz oynadın. Yəni bu dəfə əsas heyətdə yer almışdın. Bəs öz oyunundan razı qaldınmı?

Bəli həmin oyunda əsas heyətdə meydana çıxdım. Əlbəttə ki, güclü rəqibə qarşı oynadım. Öz oyunumdan tam razı qalmadım. Ümumi planda səhvlərim demək olar ki, yox idi. Lakin bir futbolçu kimi tam razı qala bilmədim. Biraz daha çox səy göstərməliyəm. Çünki mən potensialıma bələdəm. Bundan da, qat-qat yaxşı performans göstərməyə qadir futbolçuyam. Bunu illərlə qazandığım təcrübə ilə toplamışam. İnşəallah növbəti qarşılaşmalarda, oyundan - oyuna daha da, yaxşı olacam.

Növbəti oyununuz son zamanlar məğlubiyyət tanımayan, dünən də, “Neftçi”ni səfərdə məğlub edən “Sabah”a qarşı olacaq. Bu oyunda qələbə şanslarınızı necə dəyərləndirirsən?

Doğurdan da, “Sabah” klubunda böyük irəliləyişlərin şahidi oluruq. Bundan başqa yeni baş məşqçiləri gəlib. Bu oyunlarda göstərdi ki, komandasını toparlaya bilib. Bütün bunları nəzərə alsaq, bizi çox çətin və ağır oyunlardan biri gözləyir. Lakin turnir cədvəlində hazırki durum elədir ki, üç xal bizə hava-su kimi vacibdir. Mütləq qələbə lazımdır. Əlimizdən gələni edəcəyik ki, “Sabah”la oyunda qalib gələn tərəf biz olaq.

Əli HIYATİ