"Keşlə" klubunun təcrübəli futbolçusu Tural Axundovun Futbolmedia.Az saytına müsahibəsi.

Tural Qış fasiləsi ərəfəsindəyik.Artıq komandanız məşqləri bərpa edib. Bu gün məşqdə iştirak etdin. Məşqlər necə keçdi?

Artıq komandamız üçün istirahət bitdi.Komanda bir yerə toplaşdı. Baş məşqçi Sənan Qurbanovla görüşdük. Baş məşqçi bizə bütün fikirlərini açıqladı. Bildiyiniz kimi təlim-məşq toplanışı Azərbaycanda olacaq.Yəni xarici ölkəyə getməyəcəyik. Mən özüm də, məşqlərə biraz gec qatıldım. Bu səhətimlə əlaqədar idi. Yüngülvari xəstələnmişdim. Artıq sağaldığım üçün məşqlərə qatıldım.

İlk məşqlər adətən yüngül keçirilir. Sizdə durum necədir?

Mən deməzdim yüngül keçdi. Bir neçə gündür ki, məşqlər bərpa edilib. Artıq yavaş-yavaş məşqlər sərtləşdirilir. Yəni tempi biraz qaldırmışıq.

Komndanız fasilə zamanı yeni transferlər etdi. Bildiyimizə görə Franko və Fəhmin Muradbəyli komandanızın heyətinə qatıldı. Bu futbolçular haqda təcrübəli futbolçu olaraq fikirlərin?

Düzünü deyim ki, Franko ilə bir klubda oynamamışam. Yəni belə yaxından tanışlığımız yoxdur. Lakin Fəhmin Muradbəylini yaxşı tanıyıram. Bu futbolçu istənilən mövqedə oynamağı bacarır. Lakin bu iki futbolçu komandamıza gəlibsə demək faydası dəyəcək. Yəni rəhbərlik və baş məşqçi belə qərar veribsə, demək belə məsləhət bilib. Yəni komandamızın gücünə-güc qatacaqlarına ümüd edirəm.

Fasilədən sonra sizi komanda olaraq uzun bir marafon gözləyir. Yəni premyer-liqada çox çətin oyunlar olacaq. Necə düşünürsən, fasilədən sonra daha güclü “Keşlə” klubu görə biləcəyikmi?

İlk növbədə, komandamıza yaxşı transferlər lazımdır. Əgər yaxşı transferlər olarsa, komandamız daha gücl olacaq. Bu amil də, premyer-liqa oyunlarında mütləq öz bəhrəsini verəcək. Məqsədimiz və istəyimiz mövsümün sonu ilk 3-lükdə qərarlaşmaqdır. Çox istiyərdik ki, bu belə olsun. Bunun üçün əlimizdən gələni edəcəyik. Çünki fasiləyə qədər olan oyunlarda çox xal itirdik. Buna görə, çox diqqətli olmalıyıq. İnşəallah mövsümün sonunda mükəfatçılar sırasında olarıq.

Tural komandanın təcrübəli, əsas üzvlərindən birisən. Hazırda hansı formadasan. Ümumiyyətlə, premyer-liqa oyunlarının başlamasına qədər hazır olacağını düşünürsən?

Məşqlərimi necə lazımdırsa edirəm. Hətta artıqlaması ilə məşqlər davam edir. Düşünürəm ki, oyunların başlamasına qədər tam optimal formada olacam. Məqsədim komandama var gücümlə kömək etməkdir.

Əli HƏYATİ