"Keşlə" klubunun qapıçısı Kamal Bayramovun Futbolmedia.az saytına müshibəsi.

Kamal uzun Premyer Liqanın startından son 3 tura qədər komandanız uğursuzluq yaşayırdı. Komandanızın oyununda hər şey vardı, lakin bircə nəticə gəlmirdi. Belə desək,”qara zolağa” düşmüşdünüz. Lakin hazırda bu tilsimi qırdığınızı söyləmək olar. Artıq “Keşlə”nin uğurlu seriyasından danışmağa başlayıblar. Sən necə düşünürsən?

Özünüz dediyiniz kimi oyunumuzda hər şey vardı. Yüksək sürət, hücumlarımız, real qol vəziyyətləri yaratmağı bacarırdıq. Lakin nəticəni, sonluğu qoymaq alınmırdı. “Sumqayıt”la oyundakı məğlubiyyətdən sonra komanda ruh düşgünlüyü yaşamışdı. Beləcə də, ardı-ardı uğursuzluqlar gəlməyə başladı. Lakin “Qarabağ”la oyunda alınan bir xal komandaya yüksək motivatsiya verdi. “Qarabağ” kimi komandanın gücünü dəyərləndirməyə ehtyyac duymuram. Bütün Azərbaycan və Avropa “Qarabağ”ın gücünü bilir. Dünən “Kayrat”la oyunda da, bunun şahidi olduq. Sizin sayt vasitəsiylə “Qarabağ” ailəsini təbrik edirəm. Doğurdan da, “Qarabağ” çiynində tək Azərbaycan futbolunu daşıyır. Bizdə belə bir rəqiblə oyundan sonra psixoloji durumumuzda müsbət irəliləyiş oldu. Komandanın özünə inamı artdı. Yəni biz bunu bacararıq dedik. Və beləcə də,uğurların ardı gəlməyə başladı. Bu inam komandamızda vardı. Sadəcə olaraq, bizə bir qığılcım lazım idi. Ən əsası odur ki, biz çətin günlərimizdə belə komanda dğılmadı. Birləşməyi, yumruğu bir yerə vurmağı bacardıq.

Növbəti oyun “Qəbələ”yə qarşı olacaq. Rəqib komandanızın bu mövsümə yaxşı başladığı göz önündədir. Hazırda yuxarı pillələrdə qərarlaşıblar. Təkcə “Qarabağ”a məğlub olublar. Evdə “Qəbələ” ilə oyundan nə gözləyirsən. Yəni ən azı bir xal sizin üçün uğur sayılacaqmı?

İlk olaraq, onu deyim ki, “Qəbələ” klubu keçənilki, klub deyil. Bu mövsüm daha güclü, daha sürətli hücum futboluna üstünlük verirlər. Mövsümün əvvəlində də, oyunlarını görürük. Oyun zamanı 4-5 futbolçu ilə birdən hücuma atılırlar. Bu amil istənilən komanda üçün çətinlik yaradır. Mən deyərdim ki, çox yaxşı komanya qarşı oynayacağıq. Yəni bizim üçün çətin olacaq. Bütün bunlara baxmayaraq “Keşlə” komandası olaraq meydana qələbə üçün çıxacağıq. Maksimum nətcə üçün meydanda vuruşacağıq. Həmin əzimkarlığı qoruyub saxlamalıyıq. Çünki hər turda itirilən xalın sonda fəsadları çox böyük olur. İnşəallah meydana qələbə üçün çıxacağıq.Lakin yenə deyirəm ki, bizi çox ağır oyun gözləyir.

Kamal uzun zamandı ehtiyyada qalmısan. Qapıçı Namaşko əsas heyətdə oynayır. Yəni sən necə deyərlər kölgədə qalmısan. Bunun səbəbini nədə görürsən. Bəlkə yenə ağır zədən var?

Xeyir. Heç bir zədəm yoxdur. Formada olmağıma gəlincə özümü çox əla hiss edirəm. Yəni daim yüksək səviyyədə məşqlər edirəm. Bununla bağlı heç bir problemim yoxdur. Düzdü, bir müddət əvvəl ayağımla bağlı çox ağır zədəm vardı. Şükürlər olsun ki, çətinliyi artıq geridə qoymuşuq. Şans verilən anda maksimum şəkildə komandama kömək olmağa hazıram. Buna gücüm də var, illərlə topladığım təcrübəm də. Bundan başqa həmkarım qapıçımız Namaşkonun çıxışlarını da yüksək qiymətləndirirəm. Belə durumda düşünürəm ki, baş məşqçi heç vaxt dəyişikliklər etməz. Lakin hər ehtimala mən daim öz üzərimdə çalışıram. Və meydana hər an çıxmağa hazıram. Allah eləməsin, zədə və ya, qırmızı vərəqə ola bilər. Futbolda belə şeylər qaçılmaz olur. Buna görə, hər zaman hazıram.

Ümumiyyətlə, əsas heyətdə yer almadığınla bağlı baş məşqçi Sənan Qurbanovla söhbətin olubmu?

Mən heç zaman karyeram ərzində heç zaman oynamamğımla bağlı məşqçilərlə söhbət etməmişəm. Yəni sırf mən niyə görə oynamıram belə deməmişəm. Çünki ilk növbədə bunun səbəbini özümdə axtarmışam. Niyə oynamıram deməmişəm. Ümumiyyətlə, bu bir başa öz həmkarına edilən hörmətsilikdir. Bunu sizin sayt vasitəsiylə bəyan edirəm ki, bütün qapıçılar eşitsin. Belələri var ki, altdan-altdan gedib baş məşqçiyə şikayyət edirlər. Mən niyə oynamıram, filan qapıçı , filan oyunda belə səhv etdi. Yəni bunlar mənlik deyil. Problemləri ilk növbədə özündə axtarmalısan. Məsələn, Namaşko hava toplarında məndən bir pillə üstündür. Məhz bu üzdən baş məşqçi Sənan müəllim ona üstünlük verir. Bunu açıq etiraf edirəm.

“Keşlə” ilə müqavilənin müddəti nə vaxta qədərdi?

“Keşlə” ilə müqaviləm mövsümün sonunda başa çatacaq. Yəni keçən mövsüm bitən kimi tez bir zamanda klub müqaviləni yeniləmək üçün təklif göndərdi. Məndə dəyərləndirdim.

Ümumiyyətlə, başqa klublardan təkliflər almısan?

Keçən mövsüm bitər-bitməz “Keşlə” müqaviləni yenilədi. Yəni vaxt çox az olduğundan təkliflər gəlmədi. Artıq mən “Keşlə”nin rəsmi olaraq futbolçusu oldum. Buna görə də, təkliflər gəlmədi.

Əli HƏYATİ