"Keşlə" klubunun baş məşqçisi Sənan Qurbanovun Futbolmedia.Az saytına müsahibəsi.

Sənan müəllim premyer liqanın 14-cü turunda səfərdə “Sumqayıt” üzərində inamlı qələbə qazandınız. Matç haqda fikirləriniz?

Oyuna çox ciddi hazırlaşmışıq. Başa düşürdük ki, fasiləyə gedirik. Və yüksək əhval-ruhiyyə ilə yollanmalıyıq. Məşqlərdə bütün tapşırıqlar üzərində yaxşı çalışmışdılar. Bu həm kubok oyununda, həm də, çempionat oyununda belə idi. “Sumqayıt”la oyunda ilk dəqiqələrdə çox istəkli olmağımız vacib idi. Yaxşı bilirik ki, çox istəkli, çalışqan olmaq, istədiyin yaxşı nəticələr qazanmaq üçün çox vacib amildir. Şükürlər olsun ki, bu oyunda qələbə qazandıq.

Səmimi etiraf edin ki, belə nəticəni gözləmirdiniz. Ən azı belə hesabla qalib gəlməyi. Yoxsa?

“Sumqayıt” səfəri hər zaman çox ağır olur. Meydanda sürətli və açıq oyun getdi. Mən deyərdim ki, həm müdafiədə, həm də, hücumda hər iki komanda əməlli başlı mübarizə apardı. Çox maraqlı bir oyun oldu. Lakin bizim qol imkanlarımız rəqibdən daha çox oldu. Mən deyərdim ki, hesab daha böyük ola bilərdi. Xeyli sayda real qol imkanlarını boşa verdik. Açığı mənim üçün hesab sürpriz olmadı.

Bildiyimə görə, artıq bir neçə futbolçu ilə yollarınızı ayırmısınız. Abanq, Nicat, Kamaradan başqa daha kimlər var siyahıda?

Hələ ki, futbolçularla danışığ keçməmişik. Çox güman ki, yaxın zamanda danışıqlarımız baş tutacaq. Bundan başqa əcnəbi futbolçuların komandamız üçün prespiktivlərini, transferi ilə bağlı baxışlarımız olur. Bilirsiniz ki, qış dönəmində, fasiləzamanı futbolçular tapmaq çox çətin olur. Çoxlarının komandaları ilə müqavilələri olur. Lakin biz də çalışırıq ki,komandamızdn göndərilən futbolçuların yerlərini dolduraq. Çünki fasilədən sonra uzun bir marafon yarışına çıxacağıq. Komandamız buna görə güclənməlidir.

Daha çox legionerlərin transferinin üzərində duracaqsınız. Yoxsa, yerli futbolçulara üstünlük verəcəksiniz?

Yaxşı yerli futbolçular tapmaq hazırda çox çətindir. Olanlar da, öz komandaları ilə maya qədər müqaviləsi var. Buna görə də, legionerlərə üstünlük verəcəyik.

Hansı ölkənin futbolçularına üstünlük verəcəksiniz. Gürcüstan, Braziliya, Ukrayna və sair?

Hələ indidən demək biraz tez olar. Axrıncı oyunumuz bir gün qabaq oldu. Mən deyərdim ki, 1-2 günə bununla bağlı işlərə start veriləcək. Namizədlər var. Lakin bir çoxusunun müqavilələri var. Bunu bizə menecerlər xəbər verir. Ona görə çox çətin durumdu. Lazımlı futbolçu tapmaq qış zamanı asan deyil. Lakin çalışacağıq ki, əlimizdən gələni edək ki, “Keşlə”ni gücləndirək.

Komandanın təlim-məşq toplanışını nə vaxta planlaşdırmısınız. Toplanışı, Bakıda, bölgələrimizdə edəcəksiniz. Yoxsa, qonşu ölkələrin birinə üz tutacaqsınız?

Toplanışımızı yanvar ayının 6-na planlaşdırmışıq. Lakin təlim-məşq toplanışını harada keçirəcəyimizlə bağlı hələ ki, bir söz deyə bilmərəm. Yaxın zamanda bunlara aydınlıq gələcək.

Əli HƏYATİ