"Keşlə" klubunun futbolçusu İlkin Qırtımovun Futbolmedia.az saytına müsahibəsi.

İlkin “qara zolağ”dan çıxaraq məğlubiyyətsiz seriyaya qədəm qoydunuz. Yəni uğura gedən yol bir xalla bağlı idimi. Sanki “Keşlə” güclü rəqibi “Qarabağ”dan xal qoparmağı gözləyirdi. Elə bundan sonra ardı gəldi. Bəs sən necə düşünürsən?


İlk öncə, deyim ki, belə bir çətin vəziyyət hər bir komanda da olur. Əlbəttə ki, bizim çıxış yolumuz xal almaq idi. Elə “Qarabağ”dan bir xal almaq hər şeyi birbaşa dəyişdi. Bu uğurlu heç-heçədən sonra komandamız sanki özünə gəldi. İnanı ki, uşaqlarla oturub söhbət etdikdə, iclas zamanında bütün bunları analiz edirdik. Gənc futbolçular deyil, daha çox təcrübəli futbolçular vəziyyətdən çıxış yolunu müzakirə edirdik. Yəni nə olur – olsun bu çətin vəziyyətdən çıxmalıyıq. Beləcə “Qarabağ”la oyundan sonra komandanın özünə inamı artdı. Nəticələr də göz qabağındadır.

Səfərdə “Səbail”lə qalib gələrək çoxlarını təəccübləndirdiniz. Bəs siz necə qələbəyə inanırdınız. Yoxsa bir xala razı idiniz?


İlk olaraq onu deyim ki, “Səbail” səfəri bütün klublar üçün təhlükəlidir. Birinci növbədə, onların stadionları çox bərbad durumdadır. Hətta bizim meydançadan da, betər gündədir. Buna görə də, həmin stadionda normal oyun nümaiş etdirmək çox çətindir. Komanda olaraq da, “Səbail”in heyətində döyüşkən uşaqlar top qovur. Məhz bu üzdən bizi çətin səfər matçı gözlədiyini anlayırdıq. Lakin şükürlər olsun ki, bu çətin oyundan üç xalla qayıtmağı bacardıq. İlk hissədə xeyli sayda real qol imkanlarını boşa verdik. Buna görə oyun zamanı narahat idik. Biz səfərə qələbə üçün getmişdik. Ən pis halda məğlub olmamalıydıq. Belə deyək da, kim ilk qolu vurdusa, həmin komanda qələbə qazanacaqdı. Şükür Allah qolda vurduq, qələbə də qazandıq.Meydançaya çıxmamışdan öncə də, rəhbərliklə söhbətimiz oldu ki, bu görüşdə məğlub olmayacağıq. Qələbəyə çox köklənmişdik.

Səncə bu tempi, motivatsiyanı qış fasiləsinə qədər saxlaya biləcəksinizmi?

Biz komanda ,məşqçilər, rəhbərlik olaraq çətin günləri gördük. İstəməzdik ki, birdə bu duruma düşək. İrəlidə də, xeyli sayda çətin oyunlarımız var. Hələ durumumuz istədiyimiz səviyyədə deyil. Ona görə, ruhdan düşmək və arxayınlaşmaq olmaz. İnanırıq ki, məğlubiyyətsiz seriyamızı davam etdirəcəyik. Belə olan halda qış fasiləsində yuxarı pillələrdə qərarlaşa bilərik. Niyə də yox?

İlkin “Keşlə”lə ilə müqavilənin müddəti nə qədərdi?

“Keşlə” ilə müqaviəmin müddəti yayda bitəcək.


Bəs hər hansı yerli və ya, əcnəbi klubdan təkliflər almısanmı?


Mən düzünü danışmağı sevirəm. Yalandan durub deyə biləmərəm. Xarici klublardan təkliflər olmayıb. Lakin yerli klublardan var. İnşəallah görək gələcəkdə necə olacaq. Hazırda bütün fikrim, diqqətim "Keşlə"yə yönəlib.

İddialı klublarımızdan təkliflər almısan. Yoxsa?

Xeyir iddialı klublardan deyil. Orta səviyyəli klublarımızdan təkliflər almışam. Azərbaycanda belə götürəndə iki iddialı klub var. Qalanları isə demək olar ki,orta səviyyəli klublardı.


Əli HƏYATİ