"Sumqayıt"ın baş məşqçisi Vaqif Cavadovun Futbolmedia.az saytına müsahibəsi.

Vaqif müəllim Azərbaycan Premyer liqasının 10-turu sizin "Sumqayıt"da baş məşqçi kimi ilk oyununuz oldu. Komandanız məğlub olsa da, hücum futbolu oynadı. Rəqibdən çəkinmədən qollar vurdu. Eyni zamanda, matç ərzində oyun üstünlüyü, top üstünlüyü sizdə oldu. Bir baş məşqçi kimi bütün bunları necə dəyərləndirərdiniz. Ümumiyyətlə, bu oyun gələcəyə ümüd verirmi?

Çox doğru deyirsiniz ki, ilk oyunumda komanda hücum futboluna üstünlük verdi. Həqiqətən də, "Sumqayıt" qarşılaşma ərzində daima hücum etdi. Və üstünlük bizim tərəfimizdə idi. Sadəcə, müəyyən səhvlərdən qollar buraxdıq. Lakin ümumilikdə, ilk oyunum olduğu üçün qənaətbəxş hesab etmək olar. Düşünürəm ki, oyundan -oyuna yüksəliş olacaq. Bilirsiniz ki, mən yeniyəm. Komandanın başında ilk oyunum idi. Müəyyən zamana ehtiyacımız var. Bu işin öhtəsindən gələcəyimi düşünürəm. Əgər özümdə bu potensialı görməsəydim, baş məşqçi olmaq qərarı verməzdim. Çalışacam ki, rəhbərliyin mənə göstərdiyi ehtimadı doğruldum.

Bəs komandada hal-hazırdakı əlinizdə olan moteriallar, futbolçular premyer liqada yaxşı və iddialı çıxış etməkmi, klubu bu düşdüyü çətin durumdan çıxartmaq üçün yetərlidirmi?

Bəli. Düşünürəm ki, yetərlidir. Komandamızda kifayyət qədər səviyyəli həm yerli, həm də, legioner futbolçular var. Düzdü, bir çoxları zədəlidir. Digərləri isə hələ ki, bərpa prosesi keçir. Hal - hazırda fiziki durumları yaxşı deyil. Müəyyən zaman lazımdır ki, özlərinə gəlsinlər. Lakin ən azından çalışacam ki, bütün futbolçularımızı həm fiziki, həm hazırlıq baxımından maksimum yüksək səviyyəyə çatdırım.

Hər baş məşqçinin özünün xüsusi proqramı və oyun sistemi var. Bəs Vaqif Cavadovun necə? düzdü, ilk oyunda sizin oyun sisteminizi görmək olardı. Tam olmasa da, hiss olunurdu ki, futbolçular başqa bir sistemə keçid ediblər. Hücuma daha çox atılmaları və sair?

Yəqin ki, sizinlə bərabər bir çoxları ilk oyunda futblçuların yeni sistemə keçidini, fərqli oyun taktikasını gördü. Əlbəttə ki, hələ tam şəkildə icra etmək üçün futbolçulara da, zaman lazımdır. Ən azı 1 ay lazımdır ki, sistemə və oyun planına tam şəkildə oturuşsunlar. İlk öncə, nəzərə almaq lazımdır ki, komanda mənim başdan qurduğum komanda deyil. Uzun zaman başqa bir məşqçinin oyun sistemində oynayıblar. Onunla çox iş görüblər. İndi mənim tətbiq edəcəyim sistem və taktika üçün müəyyən zamana mütləq ehtiyac var. Düşünürəm ki, hər şey yaxşı olacaq.

Yəqi ki, işlər yaxşı gedərsə qış fasiləsində mütləq transferlər olacaq. Yoxsa?

Əlbəttə ki, bu barədə düşünürük. Lakin hazırda konkret nələrsə demək, adlar çəkmək düzgün olmaz. Hal-hazırda qış fasiləsinə qədər qarşıdan gələn oyunlara motivatsiya etməyə çalışırıq. Çünki qarşıda bizləri çətin və asan olmayan oyunlar gözləyir. "Səbail", "Sabah" və digər klublarla oyunlara köklənməliyik. Bax belə pillə -pillə irəliyə doğru getməliyik.

Klubun rəhbəri Riad Rəfiyev oyundan sonra sizə nələr dedi. Ümumiyyətlə, razı qaldımı?

Klub rəhbərliyindən öncə də, oyundan sonra da, həm mən, həm də, komanda hər zaman dəstək görüb. Futbolçular və komanda olaraq ruhdan düşmürük. İnanırıq ki, hər şey yaxşı olacaq. Əgər klub rəhbərliyi mənə etimad göstərməsəydi, inanmasaydı, məni bu vəzifəyə təyin etməzdi. Həm mən bir baş məşqçi olaraq, həm də, komanda əlimizdən gələni edəcəyik ki, rəhbərliyin bizlərə göstərdiyi etimadı doğruldaq.

Əli HƏYATİ