"Sumqayıt" klubunun prezidenti Riad Rəfiyevin Futbolmedia.Az saytına müsahibəsi.

Riad müəllim artıq Azərbaycan Premyer Liqasının növbəti mövsümü də, başa çatır. Turnir cədvəlindəki hazırki durumunuz və göstərdiyiniz nəticələrlə bağlı klub rəhbəri kimi fikirlərinizi bilmək istərdim?

Əlbəttə ki, bu mövsüm “Sumqayıt”dan gözlədiyimiz nəticələri ala bilmədik. Biz bundan daha yaxşı nəticə istəyirdik. Çünki buna potensialımız da, imkan verirdi. Çempionatın sonuna bir tur qalıb. Sonuncu turun oyunu böyük ölçüdə heç bir şey dəyişməyıcək. Sadəcə, mövqeyimizi bir qədər yaxşılaşdıra bilərik. Bildiyiniz kimi “Sumqayıt”a yanvar ayından yeni baş məşqçi Aleksey Baqa gəldi. Bunu da, bildirmişdik ki, Baqaya mütləq zaman lazımdır. Azərbaycan futboluna, komandaya odabtasiya olmaq lazımdır. Əcnəbi mütəxəssizdən qısa zamanda nə isə yüksək nailiyyətlər tələb etmək doğru olmaz. Bizim əsas gözləntilərimiz növbəti mövsüm üçün olacaq. Çalışacağıq ki, növbəti mövsüm daha yaxşı çalışqan, döyüşgən, bir komanda formalaşdıraq.

Aleksey Baqanın gəlişindən sonra “Sumqayıt”ın oyununda sistemli dəyişikliklər oldu. Məsələn, komanda dördlü müdafiədən, üçlü müdafiə sisteminə keçdi. Əlbəttə ki, belə dəyişikliklər nəticəyə müəyyən qədər təsir göstərir. Siz necə düşünürsünüz?

Çox doğru vurğuladınız. Oyun sistemində baş məşqçi dəyişikliklər etdi. Bir çox dəyişikliklər oldu. Tərtib edilən yeni sistemə öyrəşmək var. Bunun üçün də, zaman lazımdır. Bir çox şeylər var ki, üst – üstə düşməsi, uğur qazanması üçün vaxta ehtiyyac duyulur. Bizlər futbolun içində olan bir peşəkarlar kimi bunu yaxşı bilirik. Bu 1-2 günə düzələn işlər deyil.

Sözlərinizdən belə başa düşdüm ki, Aleksey Baqaya güvəniniz böyükdür. Hələ onunla illərlə işləməkdə maraqlısınız. Yəni bu mütəxəssizdən gözləntiləriniz böyükdür. Bu belədir?

İlk olaraq, Aleksey Baqa ilə müqaviləmiz var. İkinci bir tərəfdən niyə də, yox. Niyə də, onunla işimizə, əməkdaşlığa davam etməyək. Baqa həm təcrübəli, həm nəticə vermiş bir məşqçidir. Biz bu üç ayda baş məşqçidən nə gözləyə, hansı uğur gözləyə bilərdik ki? çox qısa bir zamanda bu mümkün deyil. Onunla iş birliyinə çox maraqlıyıq. İnanıram ki, çox gözəl nəticələrini də, görəcəyik. Baqanın həm müqaviləsi, həm də, vaxtı da var ki, çempionata yaxşı bələd olsun. Yaxşı tanısın. İstədiyi oyunu, istədiyi sistemə komandanı uyğunlaşdırsın.Düşünürəm ki, bunu bacaracaq. Biz heç bir yana tələsmirik.


Riad müəllim deyilənə görə, “Sumqayıt” klubunda mayın sonunda çoxlu sayda dəyişikliklər gözlənir. Yəni komandanı tərk edəcək futbolçular çoxluq təşkil edəcək. Bu doğru məlumatdır?

Bu doğru məlumatdır ki, dəyişikliklər gözlənilir. Çoxluq təşkil edəcək, və ya, az olacağını indidən demək istəmirəm. Çünki hazırda bunu demək düzgün olmaz. Çünki hələ bizim qarşıda bir tur oyunumuz qalıb. Çmpionat bitdikdən sonra oturub baş məşqçi ilə müzakirə edəcəyik. Bu yöndə söhbətlərimiz olacaq. Müşahidə şurası ilə birlikdə qərarlar veriləcək. Bundan sonra komandada kimin qalacağı, kimlərin gedəcəyi bəlli olacaq.



Bəs yeni mövsümdə daha güclü, daha iddialı olmanız üçün bir neçə legioner transfer edəcəksinizmi. Yoxsa, elə yerli futbolçularla davam edəcəksiniz?

Düzünü deyim ki, mən bu barədə hələ fikirləşmirəm. Bundan başqa “Sumqayıt” klubu yerli və gənc futbolçularımızla iki dəfə avrokubok yarışlarında iştirak edib. Bu turnirə vəsiqə qazanmışıq. Çempionatda 3-cü yeri qazanmışıq. Bunlar elə -belə nəticələr deyil. Həm az büdcə, həm də, yerli , gənc futbolçularla bunu bacarmışıq. Buna görə də, bizim öz sistemimiz, planlarımız,strategiyamız var. Məhz bu xəttlə hərəkət edirik. Bizim başlıca məqsədlərimizdən biri də, Azərbaycan futbolunun inkişafına təkan verməkdir. Gənc, yerli futbolçuların Azərbaycan Premyer Liqasında oynaması, təcrübə toplaması,parlaması, müxtəlif milli komandalar üçün kəşf edilməsidir. Komandanı elə yerli futbolçularla da, gücləndirmək olar. Azərbaycanda çoxlu sayda səviyyəli, güclü yerli futbolçular var.

Komanda bu yay təlim-məşq toplanışını ölkə xaricində keçirəcək. Yoxsa Azərbaycanın baxımlı güşələrindən birini seçəcəksiniz?

Əlbəttə ki, təlim – məşq toplanışımız yaxşı səviyyədə olmalıdır. Bütün bunlar nəzərdə tutulub. Sadəcə, çempionat tam başa çatandan sonra bununla bağlı müzakirələr edəcəyik. Və planlı şəkildə həyata keçiriləcək. Əlbəttə ki, baş məşqçi Aleksey Baqa ilə bütün bunları danışacağıq. Və növbəti gedişatlarla bağlı qərarlar olacaq.

Azərbaycan futbolçularının, gənc istedadların üzə çıxması, müxtəlif millilərin heyətinə dəvət alması sizin “Sumqayıt” klubuna rəhbərlik etdiyiniz dönəmlərə düşür. Yəni bu işdə sizin də, zəhmətinizin olduğunu danmaq olmaz. Bu sizin klub rəhbəri kimi uğurunuzdu. Siz daha iddialı klubda çalışmaq istərdiniz. Yəni təklif olarsa,hə deyərdiniz?

Mən “Sumqayıt” klubunun prezidentiyəm. Sizin dediyiniz təklif haqda heç fikirləşməmişəm. Çox sevinirəm ki, Azərbaycan futboluna az da, olsa töhvə verirəm. Və mənim imkanım çərçivəsində bundan sonra da, öz dəstəyimi əsirgəmiyəcəm. Bir sözlə, başqa klub məni maraqlandırmır.

Əli HƏYATİ