"Turan Tovuz" klubunun aparıcı üzvü Tərlan Quliyevin Futbolmedia.az saytına müsahibəsi.

Tərlan Azərbaycan premyer liqasında maraqlı oyunlardan biri oldu. Tovuzda güclü rəqiblərinizdən olan “Sabah”ı qəbul etdiniz. Rəqibə qarşı güclü müqvimət göstərsəniz də, sonda minimal hesabla məğlub oldunuz?

“Sabah”ın gücünü və nəyə qadir olduğunu yaxşı bilirik. Bundan öncəki oyunlarını da izləmişdik. Hücum xəttinin çox güclü olduğunu yaxşı bilirdik. “Qarabağ” kimi güclü heyətə malikdir. Normal oyun oynayaraq, mübarizə apardıq. Oyunun gedişatı bizim üçün yaxşı gedirdi. Mən deyərdim ki, biraz diqqətli olsaydıq, hesabı biz aça bilərdik. İlk yarıda bunu edə bilərdik. Sadəcə, fərdi keyfiyyətlər sayəsində qapımızda qol gördük.

Səmimi danışsaq məğlubiyyətinizin əsas səbəbi kimi nəyi göstərərdin?

İlk olaraq, deyim ki, komandamızın oyununda mübarizlik vardı. Meydanda sona qədər mübarizə aparırdıq. Lakin rəqibin çox güclü və səviyyəli futbolçuları, legionerləri var. Elə qolu da, qapımıza fərdi keyfiyyətləri ilə seçilən güclü legionerlərindən biri vurdu. Topu mərkəzə yaxın yerdən götürüb bir neçə futbolçunu keçib qapımıza vurdu. Məhz Sebalyosu keçən mövsümdən yaxşı tanıyıram. Necə səviyyəli bir legioner olduğunu da, hər kəs yaxşı bilir. Məncə, fərdi keyfiyyətlər sayyəsində məğlub olduq. Futbolda məğlubiyyətlər normal bir şeydi. Məğlub olmayan dünyada heç bir klub yoxdur. Lakin ruhdan düşmürük. Növbəti oyuna hazırlaşırıq.

Növbəti oyun isə heç də, zəif olmayan “Zirə”yə qarşı olacaq. Bu tur səfərdə “Qarabağ”la qolsuz heç –heçə oynadı?

“Zirə”nin heyətinə baxdıqda, “Sabah”dan heç də, geri qalmır. Mən heyətində olan keyfiyyətli futbolçuları, legionerləri nəzərdə tuturam. Çox yaxşı kollektivləri var. Elə “Qarabağ”la oyunlarına da, baxdım. Mən deyərdim ki, əla oynadılar. Yəni onlarla oyunumuz çətin və maraqlı olacaq. Həm yerli, həm də, yüksək keyfiyyətli legionerləri var. Keytanı, Rəhim, Hamduyi və sair. Evdə onlara (1:3) məğlub olmuşduq. Çalışacağıq ki, bu məğlubiyyətin revanşını alaq. Yəni mütləq xal götürmək üçün sonacan vuruşmalıyıq.

Bu oyunda qalib gəlmək şanslarınızı necə qiymətləndirirsən?

“Zirə”ilk dördlükdə gedən klubdur. Maddi və struktur cəhətdən də, yaxşıdırlar. Lakin onlarla oyunda çox diqqətli və soyuqqanlı oynamalıyıq. Matç boyu nizam –intizama nəzarət etsək, meydanın hər qarışı uğrunda mübarizə aparsaq, xal qazanmaq olar. Düzdü, çox çətin oyun olacaq. Lakin minumum bir xalla ayrılmaq lazımdır. Qış fasiləsinə qədər xal ehtiyyatmızı artırmalıyıq.

Əli HƏYATİ