"Kəpəz" klubunun kapitanı Tural Axundovun Futbolmedia.Az saytına müsahibəsi.

Tural Azərbaycan kubokunda Gəncədə “Sumqayıt”ı məğlub edərək mərhələdən kənarlaşdırdınız. Çox gərgin bir oyun keçdi. Minimal hesabla qələbə qazanan tərəf siz oldunuz. Kamandanın kapitanı olaraq matçı analiz edər, qələbənizi dəyləndirərdin?

Maksimum şəkildə qələbəyə köklənmişdik. Bir oyundan ibarət matç idi. Üstünlüyümüz evdə oynamağımızdan ibarət idi. Çünki rəqib komanda da, meydanda sona qədər mübarizə apardı. Gördünüz ki, çox çətin və gərgin bir oyun oldu. Düşünürəm ki, qələbəyə layiq oynadıq. Hətta hesab daha böyük ola bilərdi. Biz daha çox qol vura bilərdik. Çox sevinirik ki, “Kəpəz” mərhələni adladı.

Sən özün də, bu qələbədə ən böyük pay sahiblərindən biri oldun. Lakin 75-ci dəqiqdə əvəzləndin. Hər hansı bir zədə almamışdın. Hazırda durumun necədir?

Bu əvəzlənmə zədə ilə bağlı deyildi. Hazırda şükürlər olsun ki, heç bir zədəm yoxdur. Sadəcə, baş məşqçimiz Tərlan müəllim belə qərar verdi. Baş məşqçimiz nəyi necə, və nə vaxt etməyi daha yaxşı bilir. Həmin oyunda mütləq dəyişiklər olmalı idi ki, hesabı qoruyaq. Daha enerjili gənc futbolçu meydana çıxdı. Ən əsası qalib gəldik.

Növbəti mərhələdə kubok oyununda da, bir “Qərb derbi”si baş tutacaq. Belə olacağını gözləyirdinizmi. Ümumiyyələ, bu baş tutacaq maraqlı qarşılaşma haqda nə düşünürsən. Məncə hər iki oyun böyük azarkeş kütləsinin dəstəyi altında keçiriləcək?

Düşünürəm ki, bu “qərb derbi”si kubok oyununa çox maraq qatacaq. Bəlkə də, kubokun ən çox azarkeş və anşlaq olan oyunları olacaq. Bilirsiniz ki, həm Gəncədə, həm də, Tovuzda bu oyunu 5 mindən çox azarkeş izləyəcək. Həmçinin hər iki komanda üçün çox ağır oyun olacaq. Lakin çox maraqlı, möhtəşəm azarkeş dəstəyi altında oynayacağıq. Əlimizdən gələni edəcəyik ki, növbəti mərhələni biz adlayaq. Gəncə azarkeşlərinə bu sevinci yaşatmaq üçün əlimizdən gələni edəcəyik. Buna da, qadir komandayıq. Çünki Tərlan müəllimin gəlişindən sonra komandanın oyun sistemi, nizam –intizamı, özünə inamı çox - çox artıb. Hər şeyi yenidən qurdu. İnşəallah mərhələ adlayan tərəf biz olarıq.

Azərbaycan çempionatında bir neçə gündən sonra “Şamaxı” ilə qarşılaşacaqsınız. Rəqibiniz bir neçə turda sensasiyalı nəticələr əldə etməyi bacardı. Bu oyundan nə gözləyirsən?

Mən deyərdim ki, asan oyun olmayacaq. Rəqib komanda da, bir neçə qələbə qazanıb. Özlərinə inamları xeyli artıb. Heyətlərində yaxşı gənc futbolçular çoxdur. Lakin bizə də, 3 xal hava-su kimi lazımdır. Buna görə də, meydanda sona qədər vuruşmalıyıq. Məncə, çox gərgin bir matç olacaq. Meydanın hər qarışı uğrunda mübarizə aparmalıyıq ki, sonda qalib biz olaq.


Əli HƏYATİ