Azərbaycan Premyer Liqasının 7 –ci turunda maraqlı oyunlar sırasına “Səbail” – “Neftçi” qarşılaşamasını xüsusi vurğulmaq olar. Bir çoxları “Neftçi”nin “Səbail”in süni və bərbat stadionunda xal itirəcəyini düşünürdü. Çünki “Səbail” bu stadionda güclü “Qarabağ”ı və “Qəbələ”ni belə məğlub etməyi bacarıb. Lakin bir çoxları yanıldı. Elə içi mən qarışıq. Çünki “Neftçi”nin heyətində yatmış aslan Rəhman Hacıyevin olduğunu hesaba alınmayıb. Həmin matçın qələbəsi birbaşa bu futbolçunun ayağına yazılmalıdır. Doğurdan da, R. Hacıyev “Səbail”lə oyunda da, möhtəşəm idi. Komandasının hər iki qolunda birbaşa əməyi olan futbolçu bundan artıq nə etməli idi ki? Nə etməli idi ki, baş məşqçi Reqekampf bu futbolçuya əsas heyətdə şans versin. “Sumqayıt”la oyunda möhtəşəm qola imza atan, “Şamaxı” ilə oyunda qol ötürməsi verən, “Səbail”lə oyunda hər iki qolun vurulmasında birbaşa əməyi keçən futbolçu əsas heyətdə oynamağı haqq edir. Rumın mütəxəssiz dünənki oyunda Rəhman Hacıyevi matçın 24-cü dəqiqəsində meydana atmaqla çox düzgn qərar verdiyi bir daha görüldü. Hacıyevin meydana çıxmasına qədər “Neftçi” çox zəif təsir bağışlayırdı. Məhz “Neftçi”nin 17 nömrəsi meydana girdikdən sonra komandası ac şirə döndü. Ardı - arası kəsilməyən sürətli hücumlar qurmağa başladı. Məhz bu hücumların birində oyunun 53-cü dəqiqəsində Rəhmanın qapı qarşısına ötürməsini E. Mahmudov qola çevirdi. Qoldan 4 dəqiqə sonra komanda yoldaşı Kenni Sayefə hava ilə möhtəşəm ötürmə edərək qapıçı ilə təkbə -tək çıxardı. Lakin İsrailli futbolçu real qol şansını qaçırdı. “Neftçi”nin bütün təhlükəli vəziyyətləri məhz 17 nömrəsinin üzərindən qurulurdu. Qarşılaşmanın 83 – cü dəqiqəsində əla açılaraq topu qəbul edən Rəhman xəsislik etmədən daha yaxşı mövqedə olan Patoya qol ötürməsi verdi. Pato da, bundan yararlandı. Dünənki oyunda sanki kölgədən çıxan Aslan kimi kükrəyən Rəhman möhtəşəm oyunlarından birini keçirdi. “Neftçi”nin qələbəsində ən çox pay sahiblərindən biri oldu. Fikrimcə, baş məşqçi Reqekampf Azərbaycanlı futbolçumuz Rəhman Hacıyevə əsas heyətdə şans tanımalıdır. Bunu özü üçün, komanda naminə etməlidir. Bu futbolçunun ən yaxşı oyunları hər zaman “Neftçi”də olub. Elə indi də, öz sözünü deməyə başlayıb. Mən Rəhmanın bir neçə turdakı göstərdiyi oyununa, dünənki performansına görə ona əhsən deyərdim. Bu futbolçu güclü xarakterə malikdir. Ehtiyyatda qalsa belə, tənqid olunsa belə ruhdan düşmür. Daim öz üzərində çalışır. Bu da, nəticəsi. İnanırıq ki, klublarımızda daha çox yerli futbolçularımız əsas heyətdə oynayacaq. Çünki bu amil bizə milli komandalarımız üçün mütləq lazımdır. Əsas milli komandaya gəlincə isə De Byazi mütləq Rəhmana diqqət etməlidir. Onun Milliyə çağrılması daha çox xeyrimizə ola bilər. Sonda bir söz demək istərdim. Bravo Rəhman.

Əli HƏYATİ