"Zirə" klubunun futbolçus Coşqun Diniyevin Futbolmedia.Az saytına ekskluziv müsahibəsi.

Coşqun səfərdə “Keşlə” üzərində minimal hesablı qələbə qazandınız. Azlıqda qalan rəqiblə oyunda bir qədər çətinlik çəkdiyinizi söyləmək olar. Bəs sən necə düşünürsən. Matç barədə fikirlərin?

Oyuna komanda olaraq həmişəki kimi çox ciddi hazırlaşmışdıq. Bilirdik ki, bizi çox çətin oyun gözləyir. Çox istəyirdik ki, qələbə qazanaraq turnir cədvəlində yerimizi düzəldək. Fasilədən sonrakı ilk oyunun bizim üçün uğurlu olduğunu söyləmək olar. “Neftçi” və “Qəbələ”nin xal itirməsi bizim işimizə yaradı. Lakin bu bizi rahat etməməlidir. Buna görə bu oyunda mütləq qalibiyyət üçün əlimizdən gələni etdik. Kənardan necə görünür bilmirəm, ancaq meydanda “Keşlə” ilə oyun bizə daha çətin keçdi.

Real qol vəziyyətləriniz az olmadı. Bunlardan maksimum istifadə edə bilmədiniz. Buna əsas səbəb kimi nəyi göstərərdin. Bəxtiniz gətirmədi, dəqiqlik çatmadı, yoxsa?

Əgər rəqib qapısı qarşısında bu qədər real qol vəziyyətləri yarada biliriksə, demək ki, komandada ciddi bir problem yoxdur. Sadəcə bəzi imkanları boş verdik. Məsələn mənim özümün bir neçə imaknım oldu. Lakin bunları qola çevirə bilmədim. Bundan başqa meydança amili də, buna təsirsiz ötüşmədi. Belə meydançalarda oynamaq çox çətin olur. Buna biz öyrəşməmişik. Müəyyən epizodlarda da, bəxtimiz gətirmədi. Lakin əsas odur ki, bir qol vuraraq, 3 xalı qazanmağı bacardıq.

Coşqun öz oyununla bağlı nələr deyərdin. İstənilən formanı yığa bilmisən. Oyun zamanı çox çalışırdın. Ancaq bəzi məqamlarda narazı idin?

Düzünü deyim ki, mən yaxşı formada olanda belə özümdən razı qalmamışam. Bunu mənə aşılıyan, vadar edən atam (Şahin Diniyev) olub. Atam mənim özümdən razı olmağıma heç zaman imkan verməyib. Yəni daim öz üzərimdə çalışıram. Bundan başqa baş məşqçimiz Rəşad Sadıqov da, biz futbolçulardan maksimum nəticə tələb edir. Daim diqqəti üzərimizdə olur. Düşnürəm ki, fasilədən gəldiyimiz üçün bütün futbolçularda biraz əskiklik olur. Yəqin ki, bir nçə turdan sonra hərşey düzələcək.


Qarşıda “Səbail”lə təkrar kubok oyununuz var. İlk qarşılaşmada rəqibinizi darmadağın etdiniz. Belə deyim ki, sensasiya ola biləcəyi biraz real gözlənilmir. Lakin futbolda hər nəticə ola bilir. Məsələn çempiona oyununda “Səbail” bu yaxınlarda “Qarabağ”kimi güclü komandanı (3:1) hesabı ilə məğlub etməyi bacarmışdı. Bir sözlə, sensasiya ola biləcəyi sizi narahat etmir?

Tam səmimi deyim ki, elə bir oyun yoxdur. Yəni ona rahat şəkildə çıxıb qalib gələsən. Xüsusən Azərbaycan çempionatında gözlənilməz oyunlar çox olub. Elə biri sizin qeyd etdiyiniz “Səbail” – Qarabağ” oyununu nümunə göstərmək olar. Biz hələ yolun başlanğıcındayıq. Bizim rahatlamağa ixtiyarımız yoxdur. Hər an, hər şey ola bilər. Buna görə də, “Səbail”lə oyunda ilk qarşılaşamya çıxdığımız kimi çıxmalı, oyunumuzu oynamalıyıq. Biz sensasiya olmasını istəmirik. Ona görə də, meydana çıxıb öz oyunumuzu oynamalıyıq. Mərhələni keçmək üçün sona qədər meydanda mübarizə aparacağıq.

Əli HƏYATİ