"Keşlə" klubunun baş məşqçisi Sənan Qurbanovun Futbolmedia.Az saytına müsahibəsi.

Sənan müəllim ölkə kubokunun ¼ final mərhələsində səfərdə ölkənin ən güclü klublarından olan “Qarabağ”la qarşılaşdınız. Çoxları bu oyunda bol qolu bir matç , komandanzın böyük hesabla məğlubiyyətini gözləsə də, əksinə oldu. Çox əzimkar bir mübarizə apardınız. Hətta ədalətli nəticə heç-heçə ola bilərdi. Bəs siz necə düşünürsünüz?

Bu oyuna çox böyük itkilərlə çıxdıq. Ancaq meydana çıxan futbolçularım əlindən gələni etməyə çalışdı. Lakin təssüfflər olsun ki,real qol imkanlarından yararlana bilmədik. Ancaq 90 dəqiqə ərzində oyun nizam-intizamından qopmadıq. Belə deyim ki, sonacan meydanda mübarizə apardıq. Bu əzimkarlıq oyunumuza müsbət təsir göstərdi.

Real qol imkanlarınız oldu. Sizcə bu oyundan heç-heçə ilə ayrıla bilməməyinizin əss səbəbi nə oldu?

Bilirsiniz, kim nə deyir desin. Mən həmin penalti epizoduna diqqətlə, dəfələrlə baxdım. Bizim təmiz penaltimizi vermədilər. Bundan başqa oyun boyu real qol imkanlarından yararlana bilmədik. Bütün bu amillər oyunun nəticəsinə təsir göstərdi. Fikrimcə, oyunun ədalətli nəticəsi heç-heçə olmalı idi. Çünki biz heç də, “Qarabağ”dan zəif çıxış etmədik.

Ola bilərmi ki, həmin oyunda çox gənc futbolçulara üstünlük verdiyiniz üçün sonda məğlubiyyətdən qaça bilmədiniz. Yəni Tural Axundov kimi təcrübəli, texnikalı, istənilən mövqedə oynamağı bacaran futbolçuya güvənə bilərdiniz. Bununla bağlı nə deyərdiniz?

Bilirsiniz, biz çalışırıq ki, bütün futbolçulara şans verək. Tural da bizim komandanın güvənilən futbolçusudur. Lakin iki gün öncə Turalın hərarəti vardı. Yəni xəstəlik keçirmişdi. Sonradan komandaya qoşulub meydançaya çıxmışdı.

Ümumiyyətlə,Tural Axundova güvənirsiniz?

Əlbəttə ki, ona güvəniəm. Təcrübəli, yaxşı futbolçulardandı. İnşəalah növbəti oyunlarda da meydana çıxmaq şansı var. Bütün futbolçuların bu şansı var. Mən təkcə Turala deyil, bütün komandamın futbolçularına güvənirəm. Sadəcə, gənclərə də şans verirəm. Özlərində güvən hiss etsinlər.

Artıq premyer Liqa oyunlarında yaranan fasilə başa çatır. Növbəti qarşılaşma “Zirə”yə qarşı olacaq. Bu oyun üçün şanslarınızı necə dəyərləndirərdiniz?

“Zirə” Rəşad Sadıqovun komandaya gəlişindən sonra çox yüksək səviyyəli oyun nümaiş etdirir. Mən deyərdim ki, topla çox gözəl oynayırlar. Onu deyə bilərəm ki, bizi çox çətin bir oyun gözləyir. İndidən qələbə şanslarını dəyərləndirmək çox çətin olar.Lakin komandamız istənilən rəqibə qarşı oynamağıbacarır. İstər “Neftçi”, istərsə də, “Qarabağ” kimi güclü rəqiblərdən xal alamğı bacarmışıq. Biz bütün oyunlarda olduğu kimi, “Zirə” ilə matça da meydana qələbə üçün çıxacağıq. Öz meydanımızda oynayacağıq. Çalışacağıq ki, bundan maksimum yararlanaq.

Əli HƏYATİ