Misli Premyer Liqasının 28-ci turunda keçirilən "Səbail" - "Turan Tovuz" matçında yenə hakimlər "Səbail"in əleyhinə hoqqa verdilər. Hakimliklə bağlı rəzillik yenə də, davam edir. Hələ gələk matçdakı oyuna. Şahin Diniyevin komandası "Səbail" meydanda ilk dəqiələrədən oyuna diqtə edirdi. Çoxlu sayda real qol imkanları yaratdılar. Elə bunun nəticəsidir ki, qarşılaşmanın 21-ci dəqiqəsində meydan sahiblərinin futbolçusu Pedro Nuno gözəl zərbə ilə hesabı açdı. Elə bundan sonra da, meydan sahiblərinin ilk hissədə bir neçə real qol imkanı oldu. İlk hissəni qalib bitirməyə layiq oyun nümaiş etdirən Şahin Diniyevin komandası sözün əsl mənasında şoka düşdü. Deyir sən saydığını say, gör matçın baş hakimi, VAR-kı səriştəsiz hakimlər və adı qalmaqalda hallanan baş hamim Rəvan Həmzazadə nə hoqqa verir. Əvvəlcə hakimlər briqadası matçın 30-cu dəqiqəsində "Səbail"in qapısına obsurd penalti qərarı verməyə cəhd etdilər. Lakin həmin epizod açıq-aydın göründüyü üçün buna risk etmədilər.

Çox çəh-çevirdən sonra fikirlərindən vaz keçdilər. Çünki top meydan sahibi futbolçusunun öz ayağından yerə dəyərək əlinə dəymişdi. Bu amil isə qətiyyən penalti ola bilməzdi. Lakin baş hakim Rəvan həzrətləri və onun VAR-da oturan qərəzli hakimlik edən həmkarları öz çirkin niyyətlərindən əl çəkmədilər. Nə olursa -olsun, "Səbail" bu oyunda qalib gəlməməli, qapısında penalti görməlidir deyərək, növbəti biabırçılığa əl atdılar. Oyunun 45+3 dəqiqəsində baş verən hadisəyə penalti göstərən hakimin, hakimlikdən xəbəri yoxdur deyərdim. "Turan Tovuz"un 21 nömrəli futbolçusu Aleks Souza topa meydan sahiblərin qapıçısı Səlahət Ağayevlə eyni anda çatdılar. Hər ikisi topa toxundu. Sadəcə hakimlər başa düşməlidirlər ki, topa tərəf sürətlə şığıyan futbolçuların eyni anda topa çatmasında belə toqquşma qaçılmazdı. Axı futbolçular da, insandı. Müvazinətini qəfil və istənilən anda saxlaya bilməzlər. Oyunun video görüntüsünə təkrar -təkrar bxmışam. Bu epizod da, penaltidən söhbət gedə bilməzdi. Ən azında qərarsızlıq vardı. Çünki hər iki futbolçu topa eyni anda yaxınlaşdı və toxundu. Nə qədər savadsız və qərəzli hakim olsan ki, belə epizoda penalti təyin edəsən. Görünür hakimlik "Səbail"in həmin günü qalib gəlməsini istəmirdi. Elə Şahin Diniyevin komandasının oyununda qırılma anı bax bu mənasız, dəxlisiz, olmayan penalti ilə başladı. Niyə Şahin Diniyev kimi güclü, bacarıqlı, istedadlı, işini bilən yerli məşqçilərin zəhmətini hədər etmək istəyirsiniz. Tanınmış əcnəbi məşqçilərin komandalarına belə hoqqa vermərsiniz. "Neftçi"nin oyunlarında niyə hakimlər belə hoqqa vermirlər? Çünki "Neftçi"nin yiyəsi böyük, baş məşqçisi də, tanınmış əcnəbidir. Yenə də, bir tənqidçi jurnalist olaraq fikrimdə qalıram ki, Dünən Şahin Diniyev və "Səbail"in haqqını baş hakim Rəvan Həmzazadə və hakimlər briqadası yedi. Konkret Şahin Diniyevdən qələbəni zorla əlindən aldılar. İlk yarıda hesab (1:0) qurtarsaydı, ikinci yarıda tam gücü ilə irəli atılan, müdafiədə çoxlu boşluqlar verməyə məhkum olacaq Turan Tovuz" qapısında daha bir neçə qol görə biləcəkdi. Bu gün belə hakimlik Azərbaycan futboluna üz qarasıdır. Nə edirlər etsinlər, kimlərin sifarişini yerinə yetirirlər yetirsinlər. Şahin Diniyevin komandası bu mövsüm yuxarı pillədə bitirəcək. Bu il onların Avrokubok yarışlarına vəsiqə qazanacağını düşünürəm. Çünki bunun üçün bu klubda hər şey var. Potensial, oyun üslubu, motivatsiya, nizam -intizam hər şey var. Hakimlərin özbaşına, haqsız, qərəzli, qərarlarını bu gün bizlər tənqid etməsək, gələn dəfələr, gələn həftələrdə ağ edərlər. Özünüzü yığışdırın.

Əli HƏYATİ