"Şamaxı" klubunun hücumçusu Rövşən Şahmuradovun Futbolmedia.Az saytına müsahibəsi.

Rövşən gözlənilənlərin əksinə “Şamaxı” evdə “Sabah”ı məğlub etdi. Lakin çoxları sizin böyük hesabla məğlub ola biləcəyinizi təxmin edirdi. Sənin də, iştirak etdiyin oyunda qələbəni şərh edərdin?

Çox ağır və maraqlı oyun keçdi. Rəqibimiz çox güclü, adlı –sanlı komanda idi. Heyətlərində kifyyət qədər güclü yerli və legioner futbolçular top qovur. Buna görə də, oyunun belə təzyiq altında keçəcəyini bilirdik. Bəlkə də, rəqib bizimlə oyuna çox arxayın çıxmışdı. Elə bilirdilər ki, Şamaxıya gəlib rahat 3 xalı alacaqlar. Lakin gözlənilənlərin əksinə oldu. Bu oyunda 3 xal bizə hava-su kimi lazım idi. Baş məşqçinin verdiyi tapşırıqları meydançada yerinə yetirdiyimiz üçün qələbə qazana bildik. Şükürlər olsun ki, qələbə qazanan tərəf biz olduq.

Səmimi deyərdin, qalib gələcəyinizi gözləyirdinizmi. Yoxsa, bir xala belə kifayyətlənəcəkdiniz?

Düzünü deyim ki, meydana yalnız qələbə üçün çıxmışdıq. Çünki hər oyuna final oyunu kimi çıxırıq, Sadəcə, bir çox oyunlarda bəxtsizliklə üzləşirik. Və ya, real qol imkanlarımızı sağa –sola xərcləyirik. Əlbəttə ki, güclü rəqiblə oyunda ilk məsələ məğlub olmamaq idi. Lakin şans olduqda qalib gəlməli idik. Bu oyun bizim üçün bir ölüm –dirim mübarizəsi idi. Çünki turnir cədvəlindı sonuncu pillədə idik.

Matçın ən yaxşılarından biri sən oldun. Bu qələbədə sənin də, böyük payın var. Bir hücumçu kimi əlindən gələni etdin ki, “Sabah”ın müdafiəçilərini gərginlikdə saxlayasan. Bundan başqa hücum zamanı bir neçə müdafiəçini öz üzərinə çəkməyi bacarırdın. Beləcə də, komanda yoldaşına qol vurub, fərqlənmək imkanı yaratdın. Bundan başqa sənin də, iki real qol imkanın oldu. Sadəcə, fərqlənə bilmədin. Ümumiyyətlə,öz oyunundan razı qaldınmı?

Ümumilikdə, razı qaldım. Sizin də, vurğuladığınız kimi daima rəqib müdafiəçiləri gərginlikdə saxlamağı bacardım. Komandanın hücumlarına sürətlə qoşula bilirdim. Razı qalmadığım məqam isə iki real qol vəziyyətini dəyərləndirə bilməməyim oldu. Lakin komandamın qalib gəlməsi üçün əlimdən gələni etdim. Şükürlər olsun ki, buna nail oldum. Belə götürəndə razı qaldım. İnanıram ki, növbəti turda qol vurub fərqlənə biləcəm.

Növbəti tur demişkən, rəqibiniz heç də, Sabah”dan zəif olmayan “Zirə”yə qarşı oynayacaqsınız. Bu oyunda xal qazanmaq şanslarınızı necə dəyərləndirərdin?

Bəli. “Zirə” də çox yaxşı komandadır. Heyətində tanınmış futbolçular var. Lakin biz “Sabah”ı məğlub etdiyimiz üçün əhval-ruhiyyəmiz yüksəkdir. Özümüzə inamımız artıb. “Zirə” ilə oyunda da, meydana qalibiyyət üçün çıxacağıq. Lakin ən azı məğlub olmamağa çalışacağıq.


Əli HƏYATİ