"Oyunla bağlı onu deyə bilərəm ki, futbolçuların fərdi səhvlərindən sonra qolları buraxdıq. Rəqibin oyununa baxıb təhlil etmişdik".

Futbolmedia.az xəbər verir ki, bu sözləri "Kəpəz"in baş məşqçisi Yaşar Vahabzadə Premyer Liqanın 3-cü turunda "Qəbələ" ilə matçdan sonra mətbuat konfrnasında deyib.

O, 0:3 hesablı məğlubiyyəti belə şərh edib: "Futbolçulara tapşırıqlar vermişdik və onlar bunu meydançada yerinə yetirməli idilər. Elə epizodlar oldu ki, dəqiq oynamadılar. Nəticədə qapımızda qollar gördük. Demək olmaz ki, biz tam müdafiə olunduq və ya müdafiədən çıxa bilmirdik. Hücumda da aktiv idik, epizodlar yaratdıq. Hansı ki həmin epizodları dəyərləndirə bilmədik".

Y.Vahabzadə "Üç oyunun hamısında məğlub olmusunuz, nə qədər dözə biləcəksiz" sualını belə cavablandrıb: "Ardıcıl üç turda çətin rəqiblərlə qarşılaşdıq. Hər üç komanda da avrokuboklarda çıxış edirdi. İstər-istəməz rəqiblərimizin hazırlıqları daha yaxşıdır, heyətindəki futbolçular daha keyfiyyətlidir. Biz isə yeni formalaşmış komandayıq. Futbolçular ilk dəfədir ki, birlikdə oynayır. Bəlkə də vaxt lazımdır. Dözmək məsələsinə gəlincə, vallah, bilmirəm bu suala necə cavab verim".