“İlk olaraq “Turan Tovuz” klubunun azarkeşlərini təbrik edirəm. “Səbail”lə oyunumuzu hardasa 150-200 yaxın Tovuzlu azarkeş izləyirdi. Bizlərə daima oyun boyu dəstək oldular. Uzaq bir bölgədən bu qədər azarkeşin gəlməsi asan məsələ deyil. Elə bir otmasfer yaratdılar ki, sanki Bakıda deyil, Tovuzda oynayırıq. Komandamızı bütün rəhbərlik heyətini və futbolçu həmkarlarımı təbrik edirəm. Bilirsiniz, ay yarımdan çoxdur ki, komanda formalaşmaq üçün çox əziyyətlər çəkib. “Səbail”lə oyunumuza gəlincə isə gərgin bir matç oldu. Hər iki komandaya 3 xal mütləq vacib idi. Buna görə meydanda əsl döyüş getdi. “Səbail”in səfərdə “Qarabağ”la oyununu izləmişik. Çox yaxşı təsir bağışlamışdılar. Əlimizdən gələni etdik ki, baş məşqçimizin Ayxan müəllimin tapşırıqlarını meydanda yerinə yetirək. Şükürlər olsun ki, bunu alındıra bildik. Və nəticədə meydanı qalib tərk edən komanda biz olduq. Düşünürəm ki, komanda səbirli, ağıllı oyun sərgilədi. Qələbənin əsl səbəblərindən biri də, komandamızın meydanda xarakter nümaiş etdirməsi oldu.”

Bu sözləri, Futbolmedia.Az saytına açıqlamasında “Turan Tovuz” klubunun futbolçusu Tərlan Quliyev deyib. Öz çıxışından və növbəti turdakı rəqibindən danışan T. Quliyev bunları sözlədi.

Öz sərgilədiyim oyuna gəlincə deyə bilərəm ki, pis təsir bağışlamadım. Əslində potensialım bundan da, yaxşı oyun sərgiləməyə imkan verir. Ümumi götürdükdə komanda yaxşı oynadısa, demək mən də, yaxşı oynadım. Mən heç zaman öz oyunumdan razı qalan futbolçu olmamışam. Daim öz üzərimdə çalışmışam. Dünənki oyunda öz mövqeyimdə səhvsiz oynadığımı deyə bilərəm. Qarşıdakı rəqibimiz “Sumqayıt”la oyuna gəlincə, çətin olacaq. “Qarabağ”la oyunlarına baxdıq. Demək olar ki, xal almağa çox yaxın idilər. Son əlavə dəqiqlərdə qollar buraxdılar. Hətta “Qarabağ” kimi rəqiblə oyunda xeyli real qol imkanları yaratdılar. Mən deyərdim ki, dişə -diş oyun sərgilədilər. Buna görə çətin olacaq. Lakin bizdə meydana yaxşı nəticə qazanmaq üçün çıxacağıq. İnanıram ki, oyunun sounda sevinən tərəf biz olacağıq.