Azərbaycan premyer liqasında bir neçə klub və məşqçi var ki, uzun zamandı yaxşı nəticə qazanmaqda çətinlik çəkirlər. Lakin hazırki gərgin keçən çempionatda bunu normal adlandırmaq olar. Məsələn, götürək elə "Sumqayıt" klubunu. Komanda 6-7 turdu qol vura bilmir. Neçə vaxtdır ki, qələbəyə həsrət qalıb. Lakin bu amil bütün klubların başına gəlir. Hətta avropada ən güclü klublar belə bu problemlə üzləşir. Yəni hazırki durumda komandanın baş məşqçisi gənc Vaqif Cavadovu günahlandırmaq olmaz. Hətta "Qarabağ" və "Zirə kimi heyəti və maliyəsi güclü olan klublar, Qurban Qurbanov, Rəşad Sadıxov da, zəif oyunlara görə mətbuatda xeyli vaxt tənqid edilmişdi. Yəqin xatırlayırsınız ki, Rəşad Sadıxovun rəhbərliyi altında "Zirə uzun zaman qələbəyə həsrət qaldı. Buna görə Rəşad Sadıxov mətbuatda çox sərt tənqid edildi. Lakin sonradan hər şey qaydasına düşdü. İndi demək olar ki, eyni halla Vaqif Cavadov və onun komandası üzləşib. Əlbəttə ki, belə dönəmlər müvəqqətidir. Və zamanla düzələcək. Baxıram ki, bir saytda və bəzi jurnalist həmkarlarım Vaqif Cavadovu çox sərt tənqid edib. Sanki Vaqif Cavadovun 15-20 illik məşqçi karyerası var. Onun belə səhvlər etməyə haqqı yoxdur. Əziz həmkarlar belə qərəzli yazılar yazamaq, onsuzda hazırda çətin durumda olan gənc məşqçi Vaqifi pərişan etmək, daha çətin duruma salmaq doğru şeylər deyil. Özünüz də, fikirləşin. Adam məşqçilik kareyarasında gəncdi və ilk addımlarını atır. Həmçinin Azərbaycan futboluna iz qoymuş, tarix yazmış Cavadovların soyadını daşıyır. Həmçinin, Vaqif Cavadov özü də, Azərbaycan millisinin uzun illər şərəfini qoruyub. Millimizə xallar gətirən vacib qollar vurub. Hər şey bir qırağa Vaqif Cavadov da, bizim özümüzünküdür. Yəni Azərbaycanlı gənc məşqçidir. Belə vəziyyətlərdə ona bu çətin yolda dəstək olmalıyıq. Hansısa klub rəhbəri ilə ədavətiniz varsa, buna görə gənc və heç kəsə pisliyi keçməyən baş məşqçi Vaqif Cavadovu qərəzli şəkildə əzmək, tənqid etmək düzgün deyil. İnanın mənə mətbuat olaraq ona dəstək olsaq, Vaqif Cavadov Azərbaycanda bəlkə də, ən yaxşı gənc məşqçilərdən biri olacaq. Əlbəttə ki, öz üzərində çalışsa və işində məhsuliyyətli olarsa. De Byazi kimi əcnəbi məşqçiləri heç bu qədər qınamırsınız. Sözümün canı budur ki, bizə qalan Vaqif Cavadov, Cavid Hüseynov, Ayxan Abbasov kimi məşqçilər olacaq. Öz məşqçilərimizin qədrini bilək. Baxın Azərbaycan futbolunu hazıda yaşadan öz məşqçimiz Qurban Qurbanov, rəhmətlik Böyükağa Hacıyevdir. Vaxti ilə rəhmətlik B. Hacıyev ilk dəfə Azərbaycan klubunu Avroliqanın qrupuna daşımışdı. Heç bir əcnəbi məşqçilərdən bizə xeyir gəlməz. Bəlkə də, gələcəkdə Vaqif Cavadov da, belə uğurlar əldə edərək, Azərbaycan futbol tarixinə düşə biləcək. Qurban Qurbanov kimi tarix yaza bilər. Odur ki, gəlin Vaqif Cavadov mədəni və rəhmətlik atası Fizuli Cavadov kimi mətbuata daima hörmətlə yanaşan məşqçiyə dəstək olaq. Çünki Vaqif də bizim özümüzündür.

Əli HƏYATİ