Azərbaycan premyer liqasının 13-cü turu çox maraqlı keçdiyini desək yanılmarıq. Bir çoxlarının əvvəlcədən də, "Araz Naxçıvan" - "Sumqayıt" qarşılaşmasının daha gərgin və maraqlı olacağını proqnoz etmişdilər. Elə belə də, oldu. Matç ərzində bir qol olsa da, daha çox ola bilərdi. Xüsusən də, Vaqif Cavadovun rəhbərlik etdiyi komanda daha çox qol vura bilərdi. Ümumi götürəndə də, "Sumqayıt" meydan sahiblərindən daha yaxşı oynadı. Və bütün oyun ərzində daha çox real qol imkanları əldə etdi. Düzünü desək, Elmar Baxşıyev və komandası "Araz Naxçıvan" futbol adına xoş bir oyun sərgiləmir. Konkret proqmatik oyun oynayırlar. Çox qorxaq futbol oynamaq, daha çox müdafiə ilə rəqibin matç ərzində səhvini gözləmək, futbol oynamaq deyil. Belə məşqçilər və belə komandalar heç vaxt uzun ömürlü olmurlar. Yəni belə oyunla çox uzağa gedə bilməzlər.

Lakin Vaqif Cavadov və komandası haqqında isə tam tərsini söyləmək olar. Hücum futbolu oynayırlar, heç bir güclü rəqibindən çəkinmirlər, sona qədər döyüşürlər. Sürətli əks-hücumları çox effektli olur. Oturub bir neçə turu analiz etdikdə, görürsən ki, Vaqif Cavadov gələcək üçün çox yaxşı prespektiv vəd edir. Yəni Cavadov öz üzərində daima işləyir. Komandanın hər çatışmayan çəhətlərini analiz edərək, aradan qaldırmağa çalışır. Məsələn, komandasının keçən turdakı səhvlərini, növbəti turda görmək olmur. Demək ki, səhvlər üzərində iş gedir. Həmin səhvlər tapılır, analiz edilir və aradan qaldırlması üçün müəyyən işlər görülür. Konkret V. Cavadov gənc olsa da, öz üzərində daima çalışır. Komandanın içində olmağa çalışır. Yəni futbolçularla daha yaxşı münasibət qurmağı, onlarla problemi birgə, komanda şəklində çözməyə çalışır. Bu amil isə futbolçuların baş məşqçiyə olan güvənini artırır. Yəni V. Cavadov komandada konkret bir ailə, birlik yaratmağı qısa zamanda bacarıb. Düzdü, qarşıda V. Cavadovu daha çətin və ağır oyunlar gözləyir. Lakin düşünürəm ki, bu gənc baş məşqçi bu çətinliyin öhtəsindən gəlməyi bacaracaq. Çünki komanda da, ona inanır.

Əli HƏYATİ