"Neftçi"nin baş məşqçisi Miodraq Bojoviç Misli Premyer Liqasının 35-ci turunda "Səbail"ə 3:0 hesabı ilə qalib gəldikləri oyundan sonra jurnalistlərə açıqlama verib.

Futbolmedia.az-ın məlumatına görə, mütəxəssis layiqli qələbə qazandıqlarını söyləyib:

"Oyun psixoloji baxımından çətin idi. Turnir cədvəlindəki vəziyyət bizə təzyiq göstərirdi. İtkilərimiz var idi. İlk hissədə istədiyimiz kimi oynaya bilmədik. İkinci hissədə Brayan Moreno gözəl qol vurdu. Qoldan sonra oyun da açıldı, daha güvənli çıxış etdik. Layiqli qələbə qazandıq. Qol epizodlarını yaxşı dəyərləndirdik. Bu oyuna iki yarımmüdafiəçi ilə başlamaq istəyirdik. Ən azından qol buraxmamağa çalışırdıq. Çünki bu cür meydançada oynamaq çətindir. Ona öyrəşməmişik".

"Neftçi" növbəti turda "Sabah"la heç-heçə edəcəyi və ya qələbə qazanacağı təqdirdə avrokuboklara vəsiqə əldə edəcək. Miodraq Bojoviç isə bu görüşdə yalnız qələbə haqqında düşünəcəklərini deyib: "Biz evdə daha yaxşı oynayırıq. Nəticələr də bunu göstərir. Azarkeşlərimiz qarşısında hansısa taktiki gediş barədə düşünmək yersiz olar. "Sabah"la oyunda qələbə haqda fikirləşəcəyik. Əksi barədə fikirləşmirəm də. Yəqin ki, həmin görüşdə azarkeşlər daha çox olacaq, stadion dolacaq. Bu gün bizə dəstək olan azarkeşlərimizə təşəkkür edirəm"