"Bu gün çox çətin oyun oldu. Rəqibin demək olar ki, meydanın hər qarışında bizə qarşı mübarizə aparırdı. Komandama təşəkkür edirəm. Bu cür oyunlara başqa cür köklənməliyik. Belə qələbələr psixoloji cəhətdən çox önəmlidir".

Futbolmedia.az xəbər verir ki, bu sözləri "Sabah"ın baş məşqçisi Murad Musayev Misli Premyer Liqasının 8-ci turunda bu gün "Şamaxı"ya qalib gəldikləri oyundan sonra mətbuat konfransında deyib.

Rusiyalı mütəxəssis 1:0 hesablı qələbəni belə şərh edib: "İkili mübarizələrdə və ikinci toplarda uduzmağımızdan və əks-hücumlara sürətli çıxa bilməməyimizdən narazı qaldım. Çünki, bu, rəqib üçün oynamaq imkanı yaradırdı. Biz mövqe hücumuna keçəndə onlar rahat müdafiə olunurdu.

Musayev ilk Şamaxı səfərindən razı qaldığıbı bildirib: "Əlbəttə ki, qələbə qazanmışıq deyə müsbət emosiyalar var. İnsanlar oyuna gəlirlər. Stadion təbii örtüklə olsa, daha yaxşı olar. Belə azarkeşlər qarşısında oynamaq yaxşıdır".

Baş məşqçi zədəli futbolçusu Namik Ələskərovun durumu haqda da danışıb: "Namikin əzələsində zədə var idi. Bu zədə bir az uzun çəkdi. Hazırda ümumi qrupla məşqlərə qatılmağa çox yaxındır".