“Neftçi”nin baş məşqçisi Laurentsiu Regekampf Misli Premyer Liqasının 24-cü turu çərçivəsində “Qarabağ”a qarşı keçirdikləri oyun haqda (1:1) danışıb.

Futbolmedia.az xəbər verir ki, o, matçdan sonra keçirilən mətbuat konfransında aşağıdakı fikirləri səsləndirib:

“Bu gün üç xal qazanmaq istəyirdik. Mən oyundan qabaq futbolçularımla danışanda dedim ki, qələbə üçün gəlmişik. Açıq oyun gedirdi. Hesabı 0:2 etmək üçün şansımız var idi. Lakin yararlana bilmədik. Vacib oyunçumuzu itirdik. Hesab ədalətli oldu".

Rumıniyalı mütəxəssis məqsədlərinin qələbə olduğunu qeyd edib: "Oyundan sonra oyunçularıma dedim ki, qələbə qazanmağa yaxın idik. Məqsədimiz üç xal qazanmaq idi. “Qarabağ”ın oyunçusuna qol ötürməsini etməkdə imkan yaratmamalı idik. Çalışırıq ki, oyundan-oyuna daha yaxşı çıxış edək. Oyunçularıma izah etməyə çalışıram ki, klubumuzun tarixi var. “Neftçi” formasını daşımaq olduqca məsuliyyət tələb edir".

"Neftçi"nin çalışdırıcısı "Qarabağ"ı 3 oyunun heç birində məğlub edə bilməmələrinə belə münasibət bildirib: “Qarabağ”la ilk oyun çətin perioda düşmüşdük. İsmayıl Zülfüqarlıya qarşı heç bir iradım yoxdur. Vaxt udaraq futbolçularımın rahatlaşmasına şərait yaratmağa çalışdım. Məni baş məşqçi kimi anlamaq istəsəniz, deyə bilərəm ki, bu taktiki gediş idi. Mən oyunçularımla mütəmadi olaraq danışıram. İsmayıl demək olar ki, hər oyun meydana daxil olur. Bundan əvvəlki oyunda ondan narazı qalmışdım. Bu gün ona yenidən şans verdim".

Regekampf Ataa Caberin zədələnməsi haqda bunları deyib: "Sözün əsl mənasında bütün diqqətimi oyuna yönləndirmişdim. Zədələnən futbolçumuza görə üzülürəm. Oyunçularım peşəkardılar. Bu, bizim həyatımızdır. Biz artıq buna öyrəşmişik. Aparıcı oyunçunun zədələnməsi tez müşahidə edilir".

O, indidən avrokuboklar barədə düşünmədiklərini vurğulayıb: "Biz bir dəfəyə kluba çox oyunçu gətirə bilmərik. Çalışırıq ki, addım-addım edək. Bunun üçün yüksək məbləğdə büdcə lazımdır. “Neftçi”də işləyənlər problemlərdən agahdırlar. UEFA Avropa Konfrans Liqasına hələ çox var. Siz haqlısınız. “Qarabağ”ın ehtiyat oyunçuları da güclüdür. Onların dörd zədəli futbolçusu var. Hətta ehtiyatda belə deyildilər. Özlərini çox yaxşı göstərirlər. Bizə vaxt lazımdır ki, problemləri aradan qaldıraq. Biz addım-addım çalışırıq".

Mütəxəssis hücum xəttindəki rəqabətlə bağlı bunları söyləyib: "Bəzi oyunlarda hücumçu variantımız olmadığı zaman Yeqor oynadı və vacib qol vurdu. İndi isə heyətimizdə Saldanya var. Heç də pis təsir bağışlamadı. Yeqor çox yaxşı məşq edir. Demək olar ki, Vato ilk dəfədir ki, bütün məşqlərdə zədəsiz məşq edir”.