“Kəpəz”in baş məşqçisi Azər Məmmədov Misli Premyer Liqasının 7-ci turunda “Araz-Naxçıvan” üzərində 2:0 hesablı qələbəni şərh edib.

Futbolmedia.az xəbər verir ki, mütəxəssis matçdan sonra keçirilən mətbuat konfransında komandasının çıxışından razı qaldığını bildirib:

- Şamaxıya gələn azarkeşlərimizə təşəkkür edirəm. Çox vacib qələbə qazandıq. Heyətdə itkilərimiz var idi, amma meydana çıxan futbolçular oynamayanları layiqincə əvəz etdilər. Oyunun çox çətin keçəcəyini bilirdik. “Araz-Naxçıvan”da baş məşqçi dəyişib. Belə dəyişikliklər adətən komandaya müsbət təsir edir. Onların yeni baş məşqçisinin oyun üslubunu öyrənmək imkanımız olmayıb.

Futbolçular tapşırıqlarımı yerinə yetirdilər. Buna görə onlara təşəkkür edirəm. Rəhbərlik bizə hərtərəfli dəstək göstərir. Bu qələbə onların da əməyinin nəticəsidir. Oyun o qədər də dinamik alınmadı. Əsas qələbə idi və biz buna nail olduq.

– Sizcə, qapıçı Rojerio Santos komandanın neçə faizini təşkil edir?

– Faizlə danışmayacağam. Hər futbolçunun öz güclü tərəfləri və bacarıqları ola bilər. Bizdə də belə oyunçular var. Biz sadəcə tanınmış futbolçuları bir yerə toplamaq yox, yaxşı komanda yaratmağa çalışırıq. Kimsə digərlərindən daha çox fərqlənə bilər, amma biz komandayıq. Bundan sonra da belə davam edəcəyik.

– Gələcəkdə Namiq Ələsgərovla Rəhman Hacıyevi eyni vaxtda meydanda görəcəyik?

– Bəli, belə olacaq. Hazırda optimal heyəti tam müəyyənləşdirməyə çalışırıq. Namiq həm Rəhmanla, həm də Əbubəkirlə birlikdə oynayacaq. Komandada şans verilməyən futbolçu qalmayacaq. Hər kəsə özünü göstərmək imkanı yaradacağıq.

– Xal hesabında “Zirə”yə çatmısınız. Növbəti turda məhz bu rəqiblə qarşılaşacaqsınız. Həmin oyunu “6 xallıq matç” adlandırmaq olarmı?

– Bizim üçün qazanılan hər xal 6 xala bərabərdir. Çünki maliyyə imkanlarımız və buna uyğun olaraq gücümüz məhduddur. “Zirə”yə gəlincə, bizi Gəncədə çox çətin oyun gözləyir. Ümid edirəm ki, azarkeşlərimizə yaxşı futbol nümayiş etdirəcək və xal qazanacağıq.