“Araz-Naxçıvan”ın yarımmüdafiəçisi Çarls Boli “Omoniya”ya (Kipr) qarşı keçirilən UEFA Konfrans Liqasının üçüncü təsnifat mərhələsinin ilk oyunundan (0:4) sonra jurnalistlərin suallarını cavablandırıb.

Futbolmedia.az saytının əməkdaşının da iştirak etdiyi müsahibəni təqdim edirik:

- 0:4 hesablı məğlubiyyəti necə şərh edərdiniz?

- Biz bilirdik ki, çətin oyun olacaq. Rəqib güclü idi. Onlar daha yaxşı oynadılar. Buna baxmayaraq, komanda şəklində birlikdə olmalı və cavab matçına hazırlaşmalıyıq.

- Hesab arasındakı fərqin böyük olmasının səbəbini nədə görürsünüz?

- Futboldur, bəzən udursan, bəzən uduzursan. Ola bilər bir qədər aqressivlik çatmadı. Dediyim kimi, rəqib güclü idi. Bu da işimizi çətinləşdirir. İkinci hissədə daha yaxşı oyandıq, daha çox hücum etdik. Təəssüf ki, fərqlənmək mümkün olmadı.

- Birinci hissənin ortasında zədələndiniz. Zədəniz nə dərəcə ciddidir?

- Bəli, ayağımda ağrılar var idi. Vəziyyətin nə dərəcə ciddi olduğunu bilmirəm. Sabah (bu gün-red.) müayinədən keçəcəyəm. Ümid edirəm ki, ciddi nəsə olmayacaq. Çox istəyirəm ki, cavab oyununda meydanda olum.

- Cavab matçında nəyə ümid edirsiniz?

- Komanda olaraq özümüzə inanırıq. Bu, futboldur və hər şey ola bilər. Kiprə qələbə üçün yollanacağıq. Orada nə baş verəcəyini isə birlikdə görəcəyik.

- Bir həftədən sonra Azərbaycan çempionatı start götürəcək. İlk turda da “Zirə” ilə qarşılaşacaqsınız...

- Açığı, indi çempionat barədə düşünmürük. Təbii ki, Azərbaycan Premyer Liqası bizim üçün vacibdir. Qarşıda bizi çətin oyunlar gözləyir. “Zirə” ilə görüş də həmin matçlardan biridir.