Misli Premyer Liqasının 24-cü turu çərçivəsində "Kəpəz" "Turan Tovuz"u qəbul edib. Matç 1:1 hesablı heç-heçə ilə yekunlaşıb.

Futbolmedia.az xəbər verir ki, "Kəpəz"in baş məşqçisi Azər Bağırov matçdan sonra keçirilən mətbuat konfransında oyun barədə fikirlərini bölüşüb:

"Azarkeşlərimizə sona qədər göstərdikləri dəstəyə görə təşəkkür edirəm. Futbolçularımız da meydanda can qoyaraq bu dəstəyin qarşılığını verdilər. Hazırda müəyyən çatışmazlıqlarımız olsa da, matçdan-matça daha yaxşı performans sərgiləyəcəyik. Zaman keçdikcə azarkeşlər tam fərqli, istədiyimiz futbolu oynayan "Kəpəz" görəcəklər".

Baş məşqçi rəqibin vurduğu qolu və müdafiədəki boşluqları bu cür şərh edib:

"Hücuma çıxarkən top itirdik və nəticədə zonamız boşaldı. Bir zonanı boş qoyduqda digər boşluqlar da zəncirvari şəkildə üzə çıxır. Rauf Rüstəmli həmin epizodda maksimumunu etməyə çalışsa da, amma əfsuslar olsun ki, ayağı sürüşdü. Biz əks-hücuma keçməkdən, rəqib bizi azlıqda yaxaladı. Rəqibin usta futbolçuları öz bacarıqlarını göstərdilər. Onların fərdi keyfiyyətlərini danmaq olmaz".

A.Bağırov komandanın son turlardakı stabil çıxışına da diqqət çəkib:

"Son 4-5 turdur ki, kifayət qədər stabil və istəkli oyun nümayiş etdiririk. Meydanda əsl futbol oynamağa çalışırıq və hesab edirəm ki, bu gün də maraqlı mübarizə alındı. Tapşırıqları layiqincə yerinə yetirdikləri üçün futbolçularıma təşəkkür edirəm".