”Qarabağ”ın hücumçusu Musa Qurbanlı Azərbaycan Premyer Liqasının 29-cu turu çərçivəsində “Neftçi”yə qarşı keçirdikləri səfər oyunundan (5:1) sonra fikirlərini bölüşüb. Futbolçu bu qarşılaşmada dubl edərək, fərqlənib.

Futbolmedia.az xəbər verir ki, o, matçın baxımlı keçdiyini vurğulayıb:

“Çox maraqlı oyun alındı. “Neftçi” ilə oyunlarımız həmişə gərgin keçir. Stadionda atmosfer möhtəşəm idi. Azarkeşlərimizə bizə verdikləri dəstəyə görə təşəkkür edirəm.

Oyun da maraqlı keçdi, bolqollu oldu. Həm bizim üçün, həm də tamaşaçılar üçün baxımlı qarşılaşma alındı. Şükürlər olsun ki, belə alındı. Derbidə qol vurmaq tamam başqa sevincdir. Bu oyuna çox motivasiyalı hazırlaşmışdım. Həm komandaya kömək etmək, həm də faydalı olmaq istəyirdim. Qol vurmaq əsas məsələ deyil. Belə oyunda komandaya fayda vermək mənim üçün daha sevindiricidir. Amma dayanmaq olmaz. Qarşıda bizi yenə vacib oyun gözləyir. Bir neçə gündən sonra növbəti matçımız var. Ona görə boşalmaq olmaz, indidən hazırlaşmalıyıq. Biz çalışırıq ki, yalnız öz işimizi görək. Başqa komandaların nəticələri haqqında düşünmürük. Çalışırıq hər oyunda maksimum nəticə qazanaq. Bizim işimiz budur”.

Hücumçu, oyundan sonra “Neftçi”nin oyunçusu Emil Balayevlə söhbəti haqda da danışıb:

“Emil həm kapitan, həm də təcrübəli futbolçudur. Mən düşünürəm ki, bəzi davranışlar düzgün deyil. Biz həm “Neftçi”yə, həm də onların azarkeşlərinə həmişə hörmətlə yanaşmışıq. “Neftçi” böyük klubdur, köklü tarixə malik komandadır. Hörmətin qarşılığı da hörmət olmalıdır.

Bu gün qələbə qazanmaq vəziyyəti xeyrimizə dəyişdi və üstünlüyü bizə verdi. Bilirdik ki, mütləq qalib gəlməliyik. Meydana da qələbə üçün çıxmışdıq. Əlimizdən gələni etdik və istəyimizə çatdıq. Amma yenə deyirəm, qarşıda bizi ciddi oyun gözləyir. Ona görə hazırlaşmalıyıq”.