“Mən məşqçilərlə, komanda ilə görüşdüm, həmçinin "Tele2 Arena"da oldum. Keçən bazar günü matça baxdım. Əvvəllər "Yurqorden" haqqında bir az bilirdim, amma buraya gələndən sonra müsbət təəssüratlarım daha da gücləndi”.

Futbolmedia.az xəbər verir ki, bu sözləri Azərbaycan millisinin üzvü Musa Qurbanlı yeni klubu "Yurqorden"ə keçidi haqqında danışarkən deyib. O, İsveç təmsilçisinin saytına açıqlamasında klubun idman direktoru Bosse Andersson ilə söhbəti barədə də fikirlərini bölüşüb: “O, əla insandır və onun futbola necə inanılmaz həvəsli olduğunu görə bilərsiniz. O, futbol oynadığı vaxtlarda hücumçu mövqeyində çıxış edib. Ona görə də mən Bosse Andersonda özümün bir hissəmi tapıra və bizim çox yaxşı əlaqəmiz var”.

Qurbanlı "Yurqorden"ə keçməzdən əvvəl başqa klublardan da təkliflər aldığını deyib: “Sirr deyil ki, bir çox başqa klublardan da maraq var idi. Amma "Yurqorden"i seçməyimin səbəbi odur ki, məndə dərhal ciddi münasibət və böyük maraq hiss etdim. Məşqçilər, Bosse və görüşdüyüm klubun bütün nümayəndələri açıq və dürüst idilər ki, məni burada - "Yurqorden"də görmək istəyirlər. Digər klubların heç biri "Yurqorden"in göstərdiyi inamlı əzmkarlığa çatmadı. Sonda bu, mənim üçün vacib amilə çevrildi”.

Hücumçu oyun tərzindən danışaraq bunları qeyd edib: “Mən tipik "9 nömrə"yəm, hər zaman qol vurmaq üçün fürsət axtaran hücumçuyam. Qol vurmaq mənim həvəsimdir. Uşaq vaxtı mümkün qədər çox qol vurmaq istəyirdim. Ona görə də həmişə irəlidə düşünməyə çalışıram və variantları axtararaq cərimə meydançasına qaçıram. Eşitdim ki, "Yurqorden" mən tipli oyunçu axtarır. Zehni aspekt mənim güclü tərəflərimdən biridir, ona görə də bu rolu üzərimə götürməyə hazıram və "Yurqorden" üçün qollar vurmağa başlamağı səbirsizliklə gözləyirəm.

Qurbanlı fikirlərinə belə davam edib: “Aydındır ki, mənə təzyiqlər var. Ancaq bu, məni qətiyyən narahat etmir. Təzyiq futbolun bir hissəsidir və onsuz inkişaf etmək olmaz. Mənim işim qol vurmaqdır və komandaya töhfə vermək üçün hər zaman çox çalışıram. Yeni titullar qazanmaq üçün əlimdən gələni edəcəyəm”.