"Çətin oyun oldu. "Zirə" əbəs yerə bu çempionatda lider deyil. Məğlub da ola bilərdik. Sona qədər mübarizə apardıq",

Futbolmedia.az xəbər verir ki, bu sözləri "Araz-Naxçıvan"ın baş məşqçisi Azər Bağırov Misli Premyer Liqasının 8-ci turunda bu gün "Zirə"yə qalib gəldikləri oyundan sonra mətbuat konfransında deyib.

O, lider üzərində qazanılan qələbəni (1:0) belə şərh edib: "Səbirlə müdafiə olunduq və lazım olan qolu vurduq. Futbolçularla həm fərdi, həm də kollektiv şəkildə mütəmadi söhbətlər edirik, eyforiyaya qapılmaqdan söhbət gedə bilməz. Arxada qalan 8 oyun ərzində "Sumqayıt"la qarşılaşmanın ilk hissəsində rəqibə uduzduq. Qalan matçlarda uşaqlar yaxşı çıxış etdilər, mübarizə apardılar".

A.Bağırov ölkə xaricində toplanış keçməmələrindən, komandanı gec formalaşdırmalarından da danışıb: "Bunlar artıq geridə qalıb. Biz bəhanə gətirməyi heç vaxt sevməmişik. Hamı toplanışda olanda, biz hələ 12 nəfərlə Bakıda məşq edirdik. Bunların hamısı geridə qalıb, bəhanələri atmaq lazımdır. Günlərimiz olub ki, 2-3 saat yatmışıq. Yəni, əvvəl itirdiyimiz vaxtı kompensasiya etmişik. Bu gün qalib gəlsək də, yenə işimiz çoxdur.