“İki fərqli hissə izlədik. Birinci hissədə boşluqlar verdik, xüsusilə də yarımmüdafiə xətti tapşırıqları tam şəkildə yerinə yetirə bilmədi. İkinci hissədə isə çoxsaylı qol epizodlarımız oldu. Həm cinahlardan, həm də orta xətdən məhsuldar ötürmələr etdik. Məncə, bu gün “Sumqayıt” 1 xal qazandı".

Futbolmedia.az xəbər verir ki, bu sözləri “Araz-Naxçıvan”ın baş məşqçisi Azər Bağırov Misli Premyer Liqasının 4-cü turundə "Sumqayıt"la 1:1 hesablı heç-heçə etdikləri oyundan sonra keçirilən mətbuat konfransında deyib.

"İkinci hissədə tam fərqli oyun nümayiş etdirdik. Halbuki həmin oyunu fasiləyə qədər də göstərməli idik. Birinci hissədə edə bilməməyimizin səbəbi oyunçuların rəqibin epizodik açılmalarını tam izləyə bilməməsi idi. Elə olurdu ki, bir hücumçunu 2 oyunçumuz tuturdu. Tapşırığımız isə bu idir ki, müdafiəçilər birəbir oynasınlar. Rəqib hücumçunun mərkəzə açılması futbolçularımızı yanıldırdı. Bunu ikinci hissədə etdik və bəhrəsini gördük. Premyer Liqada keçirdiyimiz 4 oyun ərzində ən zəif hissəni oynadıq" - deyə o bildirib.

Mütəxəssis komandanın çatışmayan cəhətlərinin olduğunu vurğulayıb: "Çempionata ən gec qoşulan komandayıq. Transfer məsələsinə gəldikdə, yeni hücumameyilli oyunçunun keçidi gözlənilir. Səhv etmək istəmirik. Heyətimizdə oyunçu sayı azdır. Buna görə də rotasiyalar etməyə məcburuq”.