"Burada olduğuma görə çox xoşbəxtəm. "Zirə" ilə oyunu səbrsizliklə gözəyirəm. Komanda yoldaşlarım və infrastrukturla tanış olmuşam. Bu, məni çox sevindirdi".

Futbolmedia.az xəbər verir ki, bu sözləri "Neftçi"nin yeni transferi Mateus Saldanya klub televiziyasına açıqlamasında deyib. O, artıq komandaya uyğunlaşmağa başladığını bildirib. Mateus söyləyib ki, paytaxt təmsilçisinin uğurlu nəticələr qazanması üçün əlindən gələni edəcək:

"Ümid edirəm ki, bu gün debüt oyunum uğurlu alınacaq. Kollektivdəki ab-hava çox yaxşıdır. Yavaş-yavaş komandaya uyğunlaşıram. Bəzi komana yoldaşlarımı daha da yaxşı tanımağa başlayıram. Şəhəri çıxıb gəzməyə vaxtım olmasa da, foto və videolarda gördüklərimə görə deyə bilərəm ki, Bakı çox möhtəşəm şəhərdir. Çalışacağam ki, bugünkü matçda azarkeşlərimizə öz oyunumla ümid verim. Hər bir futbolçunun özünə uyğun xarakteristikası var. Çalışacağam ki, öz oyunumla hücumçu narazılığına son qoyum, adımı "Neftçi"nin tarixinə yazmaq üçün əlimdən gələnin ən yaxşısını edim. Əsas məqsədimiz yuxarı pillələrdə qərarlaşmaq və yayda avrokuboklarda uğurlu çıxış etməkdir".

Qeyd edək ki, "Neftçi" Mateusu yanvarın 26-da Yaponiyanın “JEF Yunayted Çiba” klubundan 1 illik icarəyə götürüb.

Xatırladaq ki, "Neftçi" Misli Premyer Liqasının 20-ci turu çərçivəsində bu gün saat 17:30-da "Zirə" ilə qarşılaşacaq.