"Kəpəz"in baş məşqçisi Tərlan Əhmədov Azərbaycan Premyer Liqasının 6-cı turunda "Turan Tovuz"a uduzduqları matç (0:2) barədə danışıb.

Futbolmedia.az xəbər verir ki, mütəxəssis komandasının görüşdə yaxşı oynadığını deyib:

"Komandanı qəbul edəndə bəzi oyunlara baxıb gördüm ki, potensial var. Nəsə etmək olar. Bu gün bunun bir daha şahidi oldum. Üstünlük bizdə olsa da, yaxşı oynayıb məğlub olduq. Futbolda bəzən belə olur, yaxşı mübarizə aparıb uduzursan. Kaş ki, pis oynayıb qalib gələrdik. Uşaqlar göstərdilər ki, istək var. Yaxşı komanda qurmaq olar. Çatışmazlıqlarımız var, görəcəyimiz iş çoxdur. Hücum xəttindəki problem daha qabarıq görünür. Oyun baxımından komanda topa daha çox nəzarət edirdi. Çalışırdıq rəqibi topsuz qoyaq, boş zonalar əldə edək. Birinci və ikinci hissədə qol epizodlarımız oldu. Məyus olub, depressiyaya qapanmaq olmaz. Qarşıda oyunlar var. Komandanı qışa qədər yaxşı hazırlamaq bizim borcumuzdur".

T.Əhmədov futbolçu Rauf Əliyevin məşqlərdən uzaqlaşdırılaraq əvəzedici komandaya göndərilməsi məsələsinə də toxunub. O, Rauf Əliyevin yerinə yeni hücumçu alınacağını istisna etməyib: "İki-üç mövqeyə futbolçu axtarırıq. Qışadək yeni nəfəs olmalıdır. Hücumda aqrsessivlik yarada, qol epizodlarından yararlana bilmirik. Axtarışlar davam edir. Yaxın günlərdə əcnəbi forvard transfer edə bilərik. Rauf Əliyevin dalınca heç kim getməyəcək. "Hər şey intizamla bağlıdır. Əfran İsmayılov və Axundov təcrübəli futbolçulardır. Belə oyunçular olmasa, inkişaf etmək çətindir".

Əhmədov kapitan Tural Axundovun ehtiyatda qalması barədə isə bunları deyib: "Turalın ehtiyatda qalması o demək deyil ki, daim mənim yanımda oturacaq. Standart vəziyyətlər zamanı rəqibin uca boylu futbolçularını nəzərə aldığımız üçün onun yerinə Elçin Əmirlini oynatdıq. Özünü yaxşı tərəfdən göstərdi. Kim güclüdürsə, meydanda da o olacaq. Əfranın zədəsi var. Son məşqdə topuğundan xəsarət alıb".