"Qəbələ"nin baş məşqçisi Elmar Baxşıyev Konfrans Liqasının 2-ci təsnifat mərhələsində Macarıstan "Fehervar"ına qalib gəldikləri cavab matçı (2:1, ilk oyun - 1:4) barədə fikirlərini bölüşüb.

Futbolmedia.az xəbər verir ki, o, oyundan sonra keçirilən mətbuat konfransında deyib:

- Oyunun çətin keçəcəyini öncədən bilirdik. Rəqib yaxşı təşkilatlanmış komandadır. İlk oyunda böyük hesabla uduzmağımıza baxmayaraq, komandam bugünkü matça yaxşı motivasiya ilə çıxmışdı. Bir az şansımız olsaydı, nəticə fərqli ola bilərdi. Daha da güclü olacağıq.

- Ehtiyat qüvvənizin olmamağı oyununuza necə təsir etdi? Sanki Konfrans Liqasından daha çox Premyer Liqaya hazırlaşırsınız.

- Turnirə o qədər də soyuq yanaşmamışdıq. Biz də istəyərik ki, geniş heyətimiz olsun. Hər şey büdcəyə bağlıdır. Ehtiyat qüvvəmiz olsaydı, ilk matç da fərqli ola bilərdi. Nə qədər geniş heyətimiz olsa, o qədər yaxşı olar. Oyunun sonunda bəzi futbolçular yorulmuşdu. Amma onları əvəz etməyə futbolçumuz yox idi.

- İlk matçda komandanız yorğun görünürdü. Sanki ikinci hissədə komanda oyundan qopdu...

- Fiziki baxımdan heç bir problem yoxdur. Bu gün də gördünüz. İlk matçda ilkin Qırtımovun dili qatlanandan sonra heç kim futbolu düşünmürdü. Bu, oyunumuza təsir etdi. Bundan başqa komandanın 99 faizi ilk dəfədir ki, avrokubokda oynayır. Təcrübə də öz sözünü deyir. Həyəcan oyunumuza təsir etdi.

- Böyükhesablı məğlubiyyətdən sonra bu gün komandanı motivasiya etmək çətin olmadı?

- Komanda göstərdi ki, psixoloji cəhətdən çox möhkəmdir.