“Bizi ağır oyunun gözlədiyini bilirdik. Rəqib çempionatımızın favoritidir. Komandam meydanda əlindən gələnin ən yaxşısını etməyə çalışdı. Baxımlı, dinamik oyun alındı".

Futbolmedia.az xəbər verir ki, bu sözləri Qəbələ”nin baş məşqçisi Elmar Baxşıyev Azərbaycan kubokunun yarımfinal mərhələsində evdə “Qarabağ”a 1:3 hesabı ilə ilk oyundan sonra keçirilən mətbuat konfransında deyib.

“Sonuncu qoldakı epizoda münasibət bildirmək istərdim. Ötən tur “Sumqayıt”la oyunda bizim lehimizə penalti verilməli idi. O, daha çox 11 metrlik zərbəyə oxşayırdı, nəinki bu. Məncə, matçın qırılma nöqtəsi sonuncu dəqiqələrdə verilən qərar idi. Düşünürəm ki, orada penalti yox idi. Bizə qarşı bir az fərqli yanaşırlar. Bizim qapımıza dərhal penalti verirlər. Bizim istədiyimiz epizodlara isə başqa cür yanaşırlar” - deyə o bildirib.

E.Baxşıyev turnirdən qopmayacaqlarını söyləyib: "Komandama inanıram. Bu kollektivi toplayanda hamı fikirləşirdi ki, belə büdcə ilə liqada 7-8-ci yeri tutacağıq. Ancaq sağlam komandam var, futbolçular daha yaxşı nəticə göstərməyə layiqdilər. Qarşıdakı oyunu düşünürük. Hamımızın iddiası var. Amma həmin iddia ilə alışıb-yanmaq yoxdur. İşimimizi elə qurmuşuq ki, yalnız qarşıdakı matçı düşünürük. Futbolçulara istənilən halda təşəkkür düşür".