“Söyləmək nə qədər ağır olsa da, nəhayət ki, qələbə qazandıq”.

Bunu “Neftçi”nin baş məşqçisi Samir Abasov Azərbaycan Premyer Liqasının XII turunda “Səbail”ı 1:0 hesabı ilə məğlub etdikləri oyundan sonra deyib.

43 yaşlı mütəxəssis mətbuat konfransında 3 matçlıq məğlubiyyət seriyasına son qoyduqları görüşü dəyərləndirib: “Eyni heyətlə ardıcıl matçlara çıxa bilmirik. Bu da itkilərlə əlaqədardır. Buna baxmayaraq, bütün futbolçulardan razıyam. Ümumiyyətlə, kiminsə üstünə günah atıb, öz yaxamızı kənara çəkmək fikrində deyiləm. Komanda daxilindəki situasiya bəhanə tapmaq istəmirəm. Gənc oyunçularımız var. Onlar da belə oyunlarda səhv edəcəklər. Bunu mən də, məndən də yaxşı futbolçular edib. Kimlərisə sıxmaqdansa, bəlkə də, onları anlamaq lazımdır. İstəyirəm ki, məndən başqa heç kim futbolçularıma söz deməsin. Müsbət tərəf odur ki, futbolçu nəticə çıxarsın. Məşqçiyə təzyiq var, söyürlər. Hərdən əsəbləşirik, burda deyirik. Bəlkə budur günahımız”.


- “Səbail” üzərində qələbə sizin istefanızla bağlı söz-söhbətə son qoyacaqmı?

- Soruşun ki, məni nə qədər narahat edir. Heç vecimə də deyil. Göndərəcəklərsə, normal haldır. Bir ay sonra hansısa klubda baş məşqçi gedən kimi, adım həmin posta namizəd yazılacaq. Şayiələr çıxaranlar və buna uyanlar var.

- Postunuzda qalaraq, yenidən çempion olmaq və ötənilki çempionluğun təsadüfi olmadığnı sübut etmək istəyirsiniz?

- Bir oyunda təsadüfi qələbə ola bilər. Amma mövsümboyu çıxışdan sonra çempion olmaq təsadüfi deyil. Rəqiblərin zəif olması məni maraqlandırmır. Fakt budur ki, qalib gəldiyimiz matçlarda güclü olmuşuq.

- Azarkeşin komandadan küsməsi sizcə, düzdür?

- Bu barədə nəsə desəm, yenə yanlış anlaşıla bilər, hələ ki, sakitlikdir. Bu, ümumi Azərbaycan futbolunun problemidir. Hamımız yaxşı günün dostlarıyıq. Bunun azarkeşlərə aidiyyəti yoxdur. Qələbə qazanmalıyıq ki, azarkeşləri yenidən stadionlara qaytaraq.

- Harramiz Soareşə şans verməməyinizin səbəbi nədir?

- Harramiz sırf azərbaycanlı futbolçu ilə bağlı limitə görə oynaya bilmir. Buna bir çarə də tapmırıq