UEFA Konfrans Liqasının 1-ci təsnifat mərhələsində "Zirə" Gürcüstanın "Torpedo" klubuna 3:0 hesabı ilə qalib gəlib.

Futbolmedia.az xəbər verir ki, paytaxt təmsilçisinin kapitanı Qismət Alıyev matçdan sonra "İdman TV"yə oyunla bağlı fikirlərini bölüşüb:

"Oyundan öncə bilirdik ki, rəqib bizimlə oynamağa yaxşı əhval-ruhiyyədə gəlir, çünki bu yaxınlarda Superkubokun qalibi olmuşdular. Təlim-məşq toplanışından sonra bizi necə bir komandanın gözlədiyini yaxşı dərk edirdik. Hazırda öz çempionatlarında da ön sıralardadırlar. Bu gün 3:0 hesabı ilə qələbə qazansaq da, düşünürəm ki, ikinci oyun bundan da çətin olacaq. Cavab qarşılaşmasına daha diqqətli və istəkli hazırlaşmalıyıq. Ümid edirəm mərhələni keçən tərəf biz olacağıq".

Futbolçu səfər qarşılaşmasında da qələbə qazanmaq əzmində olduqlarını bildirib:

"Bildiyiniz kimi, Boludakı toplanışda cəmi iki yoldaşlıq oyunu keçirmişdik. Başa düşürdük ki, avrokuboklara hazırlıq üçün iki yoldaşlıq oyunu kifayət etmir. İstər iclaslarda, istərsə də öz aramızdakı söhbətlərdə bilirdik ki, nə qədər çətin olsa da, oyun ritmini tutmaq lazımdır. Bu gün ən azından düzgün addım ataraq 3:0 hesabı ilə qalib gəldik. Bilirik ki, Gürcüstanda öz doğma meydanlarında oynayacaqlar və arxalarında ciddi azarkeş dəstəyi olacaq. Lakin biz də ilk dəqiqələrdən istəkli oynayıb, yenə də qələbə üçün çalışacağıq".