“Qarabağ”ın futbolçusu Bəhlul Mustafazadə Misli Premyer Liqasının 25-ci turunda “Neftçi”yə 4:1 hesabı ilə qalib gəldikləri oyundan sonra jurnalistlərə açıqlama verib.

Futbolmedia.az xəbər verir ki, müdafiəçi əvvəlcə oyun haqda təəssüratları ilə bölüşüb: "Düşünürəm, bütün tamaşaçılar üçün maraqlı oyun oldu. Hesab onların da xeyirinə bitə bilərdi, amma biz daha diqqətli olduq və vacib oyundan qabaq qələbə qazandıq".

O, "Neftçi" ilə matçın çətin keçdiyini qeyd edib: "Gərginlik var idi. Onlar da ikinci qolu vurub hesabı bərabərləşdirə bilərdilər. Rəqibi əks hücumlarda tutduq və 3-cü, 4-cü qolları vurduq. Düşünürəm, bərabər səviyyəli oyun keçdi, lakin biz əlimizə düşən fürsətləri daha yaxşı dəyərləndirdik".

B. Mustafazadə "Neftçi" ilə matçın Avropa liqasının 1/8 final mərhələsində "Bayer"lə oyuna müsbət təsir edəcəyini bildirib: "Bayer"lə görüşdən öncə belə bir oyuna, derbiyə çıxmaq çox önəmli idi. Düşünürəm, yaxşı mübarizə apardıq, amma bəzi səhvlərimiz var idi ki, onları analiz edib "Bayer"lə oyundan əvvəl aradan qaldırmağı çalışacağıq".

27 yaşlı müdafiəçi "çempionat cədvəlində böyük fərqlə 1-ci yerdə olduqlarından sonra növbəti oyunlara motivasiyanı necə tapacaqsınız" sualına belə cavab verib: "Onu Qurban müəllim daha yaxşı bilir. O, bizə daha yaxşı motivasiya verə bilir. Heç bir şeydən asılı olmayaraq, bütün oyunlara daha diqqətli, daha yaxşı çıxmağımızı və öz idman formamızı qorumağı tapşırır. Düşünürəm ki, bundan sonra da motivasiya tapacağıq".

O, "Bayer"i bu görüşdən sonda daha da yaxından analiz edəcəklərini bildirib: "İndividual olaraq bütün oyunçular imkan tapdıqda izləyirlər. Ümumiyyətlə isə onlar bizə məlumdurlar. Bu oyundan sonra hazırlıq mərhələsində daha yaxından tanış olacayıq. Məşqçilər rəqib haqda daha çox məlumat verəcəklər"