"Qalatasaray"ın baş məşqçisi Okan Buruk Avropa Liqasının Liqa mərhələsinin 3-cü turu çərçivəsində "Elfsborq"a qalib gəldikləri matç haqqında danışıb.

Futbolmedia.az xəbər verir ki, mütəxəssis "TRT Spor"a açıqlamasında 4:3 hesablı qalibiyyəti dəyərləndirərkən komandasından razı qaldığını deyib:

"4 qol vurduq. Amma 8-9 qol da vura bilərdik. Bizim üçün pis olan 3 qol buraxmağımız idi. Amma yenə də topa nəzarət bizdə idi. Rəqibin də təhlükəli hücumları oldu. Bəzən risksiz oynamağımız lazım gəlir. Matçın böyük hissəsində düzgün oynadıq. Çıxışımızdan, vurduğumuz qollardan razıyam. Matçlarımızı dəyərləndirəcəyik. İlk hissəyə baxsaq, görərik ki, rəqibə çox şans verməmişik. Bəzən şanssızlıq yaşadıq. Amma komandamın vurduğu qolların sayı məni xoşbəxt edir. Daha yaxşısını edə biləcək bir keyfiyyətə sahibik. Ümumilikdə futbolçularımın çıxışından razıyam.

İsveç komandası ilə qarşılaşdıq. Onlar fiziki cəhətdən bizdən güclü ola bilərlər. Amma statistika baxımından hər bir detalda rəqibdən üstün idik. Məncə, bu, Türkiyə komandalarının nə qədər güclü və yaxşı olduğunu hər kəsə göstərdi".

Qeyd edək ki, "Elfsborq" Azərbaycan təmsilçisi "Qarabağ"ın da Avropa Liqasının Liqa mərhələsindəki rəqiblərindən biridir.