“Bilirdik ki, çətin oyun olacaq. Həqiqətən də belə oldu. "Qarabağ" çox güclü, gözəl komandadır. Onların yaxşı oyunçuları var. Elə anlar oldu ki, çox çətinlik çəkdik. Komandamın oyunundan razıyam. Biz qələbəyə layiq idik. Qalib də gəldik”.

Bu sözləri "Malmö”nün baş məşqçisi Henrik Ridström UEFA Avropa Liqasının Liqa mərhələsində bu gün "Qarabağ"a 2:1 hesabla qalib gəldikləri oyundan sonra keçirilən mətbuat konfransında deyib.

Futbolmedia.az xəbər verir ki, o, jurnalistlərin suallarını cavablandırıb:

- "Reyncers"lə oyunla müqayisədə bu dəfə nə fərqli oldu?

- Bu gün daha yaxşı müdafiə olunduq. Topla çox soyuqqanlı hərəkət etdik. Oyunun sonunda rəqib bizi sıxdı. Ona qədər hücumlarımız kəsərli idi, "Qarabağ"ı bir çox hallarda müdafiəyə oturmağa məcbur edirdik.

- Belə olacağını ehtimal edirdiniz?

- Bəli. "Qarabağ" güclüdür. Oyun planını elə qurduq ki, əks-hücumları nəzarətdə saxlayaq. "Reyncers"lə oyundan razı deyildim. Bu gün daha məntiqli oynadıq.

- "Qarabağ"ın hücumçusu Musa Qurbanlı "Yurqorden"də bir mövsüm oynayıb geri qayıtdı. Sizcə, bir azərbaycanlının Skandinaviya futboluna öyrəşməsi üçün nə lazımdır?

- Demək çətindir. Skandinaviya ölkələrində fiziki aspektdən hazır olmalısan. Bu gün texniki məqamlar nəzərə çarpdı. Amma Norveç və İsveçdə fiziki hazırlıq tələb olunur.