“Komandam optimal formasından uzaq idi. İtkilərimiz də var idi. Matça tam hazırlaşa bilməmişdik. Futbolçular gözəl oyun göstərdilər. Yaxşı komandaya qarşı oynadıq. Futbolçuları təbrik edirəm. Qarşıda daha yaxşı oyunlar göstərə biləcəyik".

Futbolmedia.az xəbər verir ki, bu sözləri "Qarabağ"ın baş məşqçisi Qurban Qurbanov Azərbaycan Premyer Liqasının 15-ci turunda "Neftçi"yə 2:1 hesabı ilə qalib gəldikləri oyundan sonra keçirilən mətbuat konfransında deyib.

"Keşlə" ilə kubok görüşündə də komandadan razı qalmışdım. Futbolçular 3-4 matçdan sonra formalarına qayıdırlar. Toral Bayramov bir neçə dəfə səhv etdi. Gənc olsa da, istəyirəm ki, bu yaşda daha tez böyüsünlər. Aqressiv danışırdım ki, özünü ələ ala bilsin. Hakimlərə əsəbi deyildim. Sadəcə, bir neçə təkrarlanmış səhvə görə etirazımı bildirirdim" - deyə o bildirib.

Q.Qurbanov vacib 3 xalı yaxşı oyunla qazandıqlarını söyləyib: "İstəkli komandaya qarşı oynayırdıq. Bəzi epziodlarda bir az arxayınlıq oldu. Rəqib də bundan istifadə etməyi bacardı. İnanıram ki, bu matçı analiz etdikdən sonra bizə çox faydası olacaq. Bəzi məqamlarda daha dəqiq və diqqətli olmalı idik. Hər bir halda oyundan və komandamdan razı qaldım. Hər iki komanda azarkeşləri möhtəşəm idi. Gözəl derbi oldu.

"Həmişə çalışırıq ki, öz futbolçularımız futbola sevgi ilə yanaşsınlar. Əgər bu, varsa, inanmıram, arxayınlıq olsun. Hər oyundan həzz almalıdılar, meydana qələbə qazanmaq üçün çıxırıq. Uğurlu seriyadan sonra bəzən gözləyirik ki, hansı oyunda arxayınlıq olacaq. Qarşıdakı matçlarda daha baxımlı oyun göstərməliyik ki, azarkeşlərimiz razı qalsın".