"Maraqlı və gərgin oyun oldu. Matçın belə gərgin keçəcəyini gözləyirdik. Çünki rəqib xal itirmək, biz isə evdə məğlub olmaq istəmiridik".

Futbolmedia.az xəbər verir ki, bu sözləri "Şamaxı"nın baş məşqçisi Ayxan Abbasov Misli Premyer Liqasının 8-ci turunda bu gün "Turan Tovuz"la keçirilən oyundan sonra mətbuat konfransında deyib.

O, Şamaxıda qeydə alınan 2:2 hesablı bərabərliyi belə şərh edib: "İlk 15 dəqiqədə fərdi səhvdən qol buraxandan sonra komandada həyəcan oldu. Daha sonra üstünlük bizə keçdi. Qarşımıza qoyulan məqsədə çatmaq üçün çox çalışmalıyıq. Rəqibdən çəkinməməliyik. Son dəqiqələrdə qol buraxmaq futbolçulara pis təsir edir. Amma 1 xal da xaldır. Növbəti oyuna hazırlaşacağıq".

A.Abbasov matçın startında komandasının oyununun alınmaması ilə bağlı da danışıb: "Rəqibin əvvəlcədən dediyimiz, məşqlərdə hazırlaşdığımız hücumundan qol buraxdıq. Bundan sonra futbolçular tələsirdi. Sanki oyunun sonuna az qalmışdı. Buna görə də oyunumuz alınmırdı. Biz yeni komandayıq. Bu halları yaşayacağıq. Fasilədə danışdıqlarımız işə yaradı".

A.Abbasov sabiq komandasına qarşı oyunun onun üçün heç bir prinsipiallıq daşımadığını qeyd edib: "Biz meydançada rəqibik. Mənim üçün rəqibin kim olması fərq etmir, qazanmaq istəyirəm. Oyundan sonra "Turan Tovuz" rəhbərliyi ilə görüşdük, bir-bizimizə uğurlar arazuladıq. Heç bir problem yoxdur".