"Futbolçularımı təbrik edirəm. Məşqlərdə əsasən də legionerlər canfəşanlıq göstərirdilər, azarkeşləri stadiona dəvət edirdilər. Bu gün yaxşı dəstək var idi. Zeynəb Məmmədyarova, İlham Zəkiyev, Rafael Ağayev, Murad Arif, onların hər birinə təşəkkür edirəm. Bizim o cür dostlarımız var. Məncə, bizə heç kim dəyə bilməz. Onlar yanımızda olanda başqa motivasiya verir".

Futbolmedia.az xəbər verir ki, bu sözləri "Sumqayıt"ın baş məşqçisi Samir Abasov Misli Premyer Liqasının 34-cü turunda bu gün "Səbail"ə qalib gəldikləri oyundan sonra mətbuat konfransında deyib.

2:1 hesablı qələbəni şərh edən mütəxəssis komandasında gərginlik olduğunu bildirib: "Futbolçular psixoloji olaraq çox yüklənib. Bu, yaxşı deyil. Avropada olmaq istəyirlər. Bunun qarşısını ala bilmərik. Bəlkə də təyziq bu cür oynamağa səbəb olur".

S.Abasov "Səbail"in baş məşqçisi Şahin Diniyev onların daha yaxşı oynadığını deməsinə də münasibət bildirib: "Artıq "Səbail"lə oyunlardan sonra dördüncü mətbuat konfransıdır ki, eyni sual verilir. Amma dördüncü dəfə də biz uduruq. Şahin müəllim mənim məşqçim olub. Belə görübsə, haqq qazandırıram. Doğrudan da "Səbail" yaxşı oynadı".

S.Abasov mövsümün sonuna doğru futbolçuların üzərində olan təzyiqdən narahat olduğunu qeyd edib: "Məni qorxudan futbolçuların üzərində olan təzyiqdir. Düşünürəm ki, qol buraxsaq, nələr baş verə bilər. Sına da bilərik. Şükürlər olsun ilk qolu buraxmırıq. Hər halda futbolçularıma güvənirəm. Onlarla bura qədər gəlmişik. Fubolçularım olmasaydı, mən bunu əsla edə bilməzdim".