“Neftçi”nin baş məşqçisi Samir Abasov Azərbaycan Premyer Liqasının 17-ci turunda bu gün “Sabah”la keçirilən oyun haqda fikirlərini bildirib.

Futbolmedia.az xəbər verir ki, o, səfərdə qazandıqları 1:0 hesablı qələbədən sonra keçirilən mətbuat konfransında hələ komandada görüləsi işlərin olduğunu bildirib:“Qələbə qazanmaq, uğurlu seriyanı davam etdirmək istəyirdik. Bu qələbə bizə gələcək matçlar üçün əlavə motivasiya olacaq. Hələ görüləcək işlərimiz çoxdur. Bu, meydanda sezilir. Futbolçularımı ürəkdən təbrik edirəm”.

44 yaşlı mütəxəssis asan qələbə qazanmadıqlarını deyib: “Bu gün orta sahədəki üstünlüklə yanaşı, yaxşı mübarizə apardıq, bu baxımdan rəqibə uduzmadıq. Ümumi komanda şəklində lazımi anda futbolçular bir-birlərinə yaxın oldular, rəqibə çox boşluq vermədilər. İki mərkəz müdafiəçimiz və qapıçımız bu gün çox əziyyət çəkdilər. Həm müdafiəni, həm də orta sahəni nəzarətdə saxladılar”.

S.Abasov “Sabah”la kubok görüşdəki gərginliyin təkrarlanmaması üçün futbolçularına sakit olmağı tapşırdığını qeyd edib: “Qətiyyətlə tapşırılmışdı ki, təxribatlardan, futbola aid olmayan dava-dalaşdan uzaq dursunlar. Çünki heç bir halda bunu qəbul etməyəcəkdim. Bu gün də həddən artıq sərt oyun getdi. Bu, qınanılası şey deyil. Buna səbrlərini basdılar, üzüağ çıxdılar. Şükürlər olsun ki, buradan söz-səhbətsiz gedirik”.