"Futbolçularıma təşəkkür edirəm. Hücum xətti olmadan bir xal qazanmaq heç də pis deyil. Hər qazandığımız xal bizim üçün uğur sayılacaq. Uduzmamaq üçün çox əziyyət çəkdik. Bu gün itkiləri saymaq istəmirəm".

Futbolmedia.az xəbər verir ki, bu sözləri "Sumqayıt"ın baş məşqçisi Samir Abasov Misli Premyer Liqasının 20-ci turunda bu gün "Araz-Naxçıvan"la keçirilən oyundan (1:1) sonra mətbuat konfransında deyib.

O, komandasının bu gün 2-ci pilləyə yüksəlməsinə baxmayaraq, məqsədlərinin avrokubooklar olmadığını bildirib: "Bu gün əlimizdə bayraq etməmişik ki, burada qalacağıq. Bizim üçün həddindən artıq çətin olacaq. Özünüz görürsünüz ki, oyunlar hansı məcrada keçir. Gərginlik daha da artır. Çalışacağıq ki, real yanaşaq. Bundan sonra da xallar itiriləcək. Panikaya düşməmək lazımdır. Bu gün olduğumuz yer bizi təzyiq altına salmalı deyil. Məqsədimiz avrokuboklar deyil. Əsas məqsəd komanda qurmaqdır. Boşluqlarımız çoxdur. Oyunumuz əvvəldən axıra kimi eyni tempdə getmir. Bu gün hücum xəttimiz demək olar ki, yox idi. Olduğumuz yerdə qala bilsək, yaxşı olar".