"Deyiləcək bir söz yoxdur. Oyuna yaxşı hazırlaşmışdıq, amma istədiyimiz kimi alınmadı. Bəlkə də, bu mövsüm ən zəif oyunumuzu oynadıq. "Qəbələ" daha istəkli idi. Əslində, əskinə olmalı idi, şanslarımız qalmalı idi. Bu gün artıq avrokubok şansı yoxdur. Futbolda hər şey olur, qəbul etmək lazımdır. Yolumuza davam edəcəyik. "Qəbələ"ni təbrik edirəm. İstədiyimi isə ala bilmədim".

Futbolmedia.az xəbər verir ki, bu sözləri "Səbail"in baş məşqçisi Şahin Diniyev Misli Premyer Liqasının 33-cü turunda evdə "Qəbələ"yə 2:3 hesabı ilə məğlub olduqları görüşdən sonra açıqlamasında deyib.

Ş.Diniyev komanda yenidən qurulduğu üçün 2-ci pillədə qala bilmədiklərini bildirib: "Yeni komandayıq, futbolçular ilk dəfə idi bir yerdə idilər. Ənənə, stabillik olmalıdır. Bəzi yerlərdə güclənməyə ehtiyacımız var. Gələcəyə baxış üçün yaxşı komandamız var. Komanda 90 faiz dəyişdi, zədəlilərimiz oldu. Səhvi özümüzdə axtarmalıyıq. Altıncı yerdəyik, liqadan düşmürük. Gördüyümüz odur ki, komandanın yeni olması bu problemləri artırdı".

O, əsas məqsədlərinin "6-lıq"da qalmaq olduğunu deyib: "Stabilliyin olmaması bu yerə gətirib çıxardı. İndiki nəticəni uğurlu hesab edirik. Altılıqda qalsaq, məqsədimizə çatarıq. Avrokubok şansımız var idi. Məyus olduq. Ancaq məqsəd mövsümü 6-cı yerdə bitirməkdir. Gələn il avrokuboklara vəsiqə üçün oynaya bilərik. Biz lazımi oyunlarda özümüzü kökləyə bilmədik".